អាជ្ញាធរអាកាសចរណ៍វៀតណាមបានស្នើសុំឲ្យយន្តហោះ Boeing 737 ឆ្លងកាត់ដែនអាកាសរបស់ប្រទេសនេះបន្ទាប់ពីការផ្អាកដំណើរការ រយៈពេល ២ ឆ្នាំកន្លងមក។
សំណើនេះត្រូវបានធ្វើឡើងបន្ទាប់ពីអាជ្ញាធរអាកាសចរណ៍ស៊ីវិលវៀតណាម (CAAV) បានពិនិត្យឡើងវិញនូវកិច្ចខិតខំប្រឹងប្រែងរបស់ក្រុមហ៊ុន Boeing ក្នុងការធ្វើឲ្យប្រសើរឡើងនូវយន្ដហោះ និងការវាយតម្លៃរបស់អាជ្ញាធរអាកាសចរណ៍សំខាន់ៗ ដូចជារដ្ឋបាលអាកាសចរណ៍សហព័ន្ធសហរដ្ឋអាមេរិក និងទីភ្នាក់ងារសុវត្ថិភាពអាកាសចរណ៍របស់សហភាពអឺរ៉ុប ផងដែរ។
សូមបញ្ជាក់ថា សហរដ្ឋអាមេរិកបានអនុញ្ញាតឲ្យបន្តប្រតិបត្តិការរបស់ក្រុមហ៊ុន Boeing 737 Max កាលពីខែធ្នូ និងអឺរ៉ុបបានធ្វើដូច្នេះដែរនៅក្នុងខែមករា។ ដោយឡែក ប្រទេសចិន និងរុស្ស៊ី មិនទាន់បានបើកដែនអាកាសរបស់ខ្លួនឲ្យយន្តហោះនេះទេ។
គួររំលឹកឲ្យដឹងដែរថា យន្តហោះ Boeing 737 Max ត្រូវបានគេផ្អាកដំណើរការនៅទូទាំងពិភពលោក កាលខែមីនា ឆ្នាំ ២០១៩ បន្ទាប់ពីមនុស្ស ៣៤៦ នាក់បានស្លាប់ នៅក្នុងឧប្បត្តិហេតុពីរ នៅចន្លោះពេលបីខែ នៅប្រទេសឥណ្ឌូនេស៊ី និងអេត្យូពី៕