ទោះបីជាមានការព្រួយបារម្ភអំពីការផ្ទុះឡើងនៃជំងឺកូវីដ១៩ ថ្មីៗនេះក៏ដោយ ក៏ប្រតិបត្តិករទេសចរណ៍ថៃសង្ឃឹមថា អាជីវកម្មរបស់ពួកគេនឹងវិលត្រឡប់មកវិញនៅឆ្នាំ២០២១ នេះ ដោយសារពួកគេសង្ឃឹមលើវ៉ាក់សាំងថ្មី ដើម្បីកម្ចាត់វីរុសនេះ។
គួររំលឹកឲ្យដឹងដែរថា ការផ្ទុះឡើងថ្មីនៃជំងឺកូវីដ១៩ ដែលកើតចេញពីទីផ្សារអាហារសមុទ្រនៅសាមុតសាខុន (Samut Sakhon) បានរាលដាលដល់ ៥៣ ខេត្តទូទាំងប្រទេសថៃ ហើយការឆ្លងទំនងជាបន្តកើនឡើងទៀត។ ប្រការនេះបានជំរុញឲ្យរដ្ឋាភិបាលថៃបញ្ជាឲ្យបិទទីប្រជុំជន និងកន្លែងលក់ដូរជាច្រើន។
គួរឲ្យដឹងដែរថា វិស័យទេសចរណ៍ ដែលជាក្បាលម៉ាស៊ីនសំខាន់សម្រាប់កំណើនសេដ្ឋកិច្ចរបស់ថៃ ស្ថិតក្នុងចំណោមវិស័យដែលរងការវាយប្រហារខ្លាំងបំផុត ដោយសារជំងឺកូវីដ១៩។ យោងតាមក្រសួងទេសចរណ៍ និងកីឡារបស់ប្រទេសថៃ បានឲ្យដឹងថា វិស័យទេសចរណ៍រកចំណូលបាន ៧៦០ ពាន់លានបាត ចាប់ពីខែមករា ដល់ខែវិច្ឆិកា ឆ្នាំ២០២០ ធ្លាក់ចុះ ១,៩៣ ពាន់ពាន់លានបាត ឬ ៧១,៧៥% បើប្រៀបធៀបនឹងរយៈពេលដូចគ្នានៃឆ្នាំ ២០១៩។
ចំនួនអ្នកទេសចរបរទេសមានចំនួន ៦,៦៩ លាននាក់ក្នុងកំឡុងពេលនោះ ដែលតំណាងឲ្យការធ្លាក់ចុះ ២៩,២៧ លាននាក់ (៨១,៣៨%) ខណៈដែលប្រាក់ចំណូលពីអ្នកទេសចរបរទេស បានធ្លាក់ចុះ ១,៣៨ លានលានបាត ស្មើនឹង ៣៣២ ពាន់លានបាត (ថយចុះ ៨០,៥៩%)៕