ក្រុមហ៊ុន Coca-Cola បានឲ្យដឹងកាលពីថ្ងៃព្រហស្បតិ៍ ទី១៧ ខែធ្នូ ឆ្នាំ២០២០ ថា ខ្លួននឹងកាត់បន្ថយបុគ្គលិកចំនួន ២ ២០០ នាក់នៅទូទាំងពិភពលោក ក្នុងនោះរាប់បញ្ចូលទាំង ១ ២០០ នាក់នៅសហរដ្ឋអាមេរិកផងដែរ។
កាលពីខែសីហា ក្រុមហ៊ុនខាងលើបាននិយាយថា ខ្លួនកំពុងផ្តល់កញ្ចប់ប្រាក់លើកទឹកចិត្តសម្រាប់បុគ្គលិកស្ម័គ្រចិត្តឈប់ ៤ ០០០នាក់ នៅសហរដ្ឋអាមេរិក កាណាដា និង Puerto Rico ខណៈដែលស្ថានភាពកាន់តែប្រសើរឡើងវិញពីផលប៉ះពាល់នៃជំងឺកូវីដ១៩។
ទោះជាយ៉ាងណា ក្រុមហ៊ុន Coca-Cola បញ្ជាក់ថា ខ្លួននឹងមិនបង្ហាញចំនួនបុគ្គលិកដែលបានទទួលយកកញ្ចប់ប្រាក់នេះទេ។ ជាមួយគ្នានេះដែរ ក្រុមហ៊ុនក៏មិនបានផ្តល់ព័ត៌មានលម្អិត អំពីពេលវេលាសម្រាប់ការបញ្ឈប់បុគ្គលិកនោះដែរ។
គួរឲ្យដឹងថា ដំណឹងនៃការកាត់បន្ថយបុគ្គលិកនេះ បានកើតឡើងនៅពេលដែលជនជាតិអាមេរិករាប់លាននាក់ កំពុងអត់ការងារធ្វើរួចទៅហើយ ដោយសារតែការឆ្លងថ្មីនៃជំងឺកូវីដ១៩ ដែលជះឥទ្ធិពលដល់ប្រតិបតិ្តការអាជីវកម្មនានា៕