[ទីផ្សារបរទេស] ចំនួនលក់រថយន្តទីផ្សារសកលនៅតាមទីផ្សារធំៗចំនួន៣៧ ក្នុងខែសីហាកន្លងទៅនេះ មានរហូតដល់ ៥,៥៥លានគ្រឿង ហើយអ្វីដែលគួរឲ្យចាប់អារម្មណ៍គឺ BYD ដែលជាម៉ាកចិនតែមួយគត់ស្ថិតក្នុងចំណាត់ថ្នាក់កំពូលទាំង១០ បានហក់ឡើងចំណាត់ថ្នាក់ទីបួន នាំមុខម៉ាក Hyundai និង Ford។
តាមទិន្នន័យរបស់ក្រុមហ៊ុនស្រាវជ្រាវ TrendForce បានបង្ហាញថា BYD បានកើនឡើងចំនួនលក់ ៥% ធៀបនឹងខែសីហា ត្បិតថាតម្រូវការនៅទីផ្សារប្រទេសចិនមានការថមថយក៏ដោយចុះ។
ខណៈដែលការលក់របស់ BYD មានការកើនឡើង ការលក់របស់ Ford ឯណោះ ជួបប្រទះនឹងការថយចុះ ៦,៧% ធៀបនឹងខែមុន ដែលធ្វើឲ្យក្រុមហ៊ុនរថយន្តអាមេរិកមួយនេះថយចុះមកនៅត្រឹមចំណាត់ថ្នាក់លេខ៦។
ក្រៅពី Ford ការលក់របស់ក្រុមហ៊ុនជប៉ុនដូចជា Toyota ក៏មានការថយចុះ ២,៦% ផងដែរ ឯម៉ាក Honda មានការថយចុះ ០,៨% ប៉ុន្តែមិនបានថយចុះចំណាត់ថ្នាក់ឡើយ។ យ៉ាងណាចំណែកទីផ្សាររបស់ Honda ដែលជាប់លេខបី និង BYD ដែលជាប់លេខបួន គឺខុសគ្នាតែ ០,១% ប៉ុណ្ណោះ ដោយ ៤,៩% ធៀបនឹង ៤,៨%៕