Mazda2 Hybrid ស៊េរីឆ្នាំ២០២៤ ជិះ១០០គ.ម ស៊ីប្រេងមិនដល់ ៤លីត្រ

[ទីផ្សារបរទេស] ក្រុមហ៊ុន Mazda បានបង្ហាញចេញនូវរថយន្ត Mazda2 Hybrid ស៊េរីឆ្នាំ២០២៤ នៅទីផ្សារអឺរ៉ុប ដែលមានការផ្លាស់ប្ដូររូបរាង ជាមួយនឹងការបន្ថែមពណ៌ថ្មីឈ្មោះថា Glass Blue។

ពាណិជ្ជកម្ម

រថយន្តស៊េរីថ្មីនេះ ទទួលបានកាងក្រោមឌីហ្សាញថ្មី ជាមួយផ្ទាំងប៉ាណាមុខថ្មី ដែលបញ្ជាក់អំពីអត្តសញ្ញាណរបស់ Mazda។ ការឌីហ្សាញថ្មីនេះក៏មាននៅផ្នែកខាងក្រោយផងដែរ ដែលមើលទៅប្រៀបដូចជារថយន្តស្ព័រ។

Mazda2 Hybrid ស៊េរីឆ្នាំ២០២៤ មានប្រើប្រាស់នូវបច្ចេកវិទ្យា Hybrid វៃឆ្លាតរបស់ Mazda ដែលអាចឆ្លាស់ប្រើម៉ូទ័រអគ្គិសនី និងម៉ាស៊ីនសាំង ឬប្រើវាទាំងពីរផ្គួបផ្សំគ្នាតែម្ដង។ ម៉ាស៊ីនសាំងមានចំណុះ ១,៥លីត្រ ៣ស៊ីឡាំង ផលិតកម្លាំងបាន ៩១សេះ ហើយបើដំណើរការជាមួយម៉ូទ័រអគ្គិសនី វាអាចផលិតកម្លាំងបាន ១១៤សេះ។

ដោយឡែក ទាក់ទងនឹងកម្រិតស៊ីប្រេងវិញ រថយន្ត Mazda2 Hybrid ថ្មីនេះ ស៊ីប្រេងតែ ៣,៨លីត្រ ប៉ុណ្ណោះ សម្រាប់ការបើកបរចម្ងាយ ១០០គ.ម ហើយកម្រិតស៊ីប្រេងនេះអាចខុសគ្នាតាមទំហំកង់រថយន្ត និង Option នីមួយៗ។

Mazda2 Hybrid ជារថយន្តសំខាន់មួយរបស់ Mazda ក្នុងនាមជារថយន្ត B-segment ហើយវាគឺផ្នែកមួយនៃត្រកូលរថយន្តលំដាប់សកលរបស់ Mazda រួមបញ្ចូលទាំង Mazda3, CX-30 និង CX-5 ផងដែរ៕

ប្រភព ៖ Motor1