[ទីផ្សារបរទេស] រថយន្តតម្លៃថ្លៃ តែងតែទាក់ទាញក្រសែភ្នែកមហាជននៅពេលដែលបង្ហាញវត្តមានម្ដងៗ ហើយអ្វីដែលកាន់តែទាក់ភ្នែកទៀតនោះ គឺការបំពាក់នូវផ្លាកលេខពិសេសៗ។ ខាងក្រោមគឺជាផ្លាកលេខពិសេសដែលមានតម្លៃជាងគេក្នុងលោក ៖
១. ផ្លាកលេខ D5 តម្លៃ ៨,៩លានដុល្លារ
កាលពិខែតុលា ឆ្នាំ២០១៦ សេដ្ឋីអចលនទ្រព្យល្បីឈ្មោះក្នុងទីក្រុងឌុយបៃ បានចំណាយប្រាក់ ៨,៩លានដុល្លារ ដើម្បីទិញផ្លាកលេខ D5 បំពាក់លើរថយន្ត Rolls-Royce Phantom របស់ខ្លួន។ ផ្លាកលេខនេះត្រូវបានម្ចាស់វាយល់ថាជាផ្លាកលេខនាំសំណាង ដោយសារអក្សរ D គឺអក្សរទី៤ បូកជាមួយលេខ៥ បង្កើតបានជាលេខសំណាងលេខ ៩។ បន្ថែមពីហ្នឹង សេដ្ឋីរូបនេះក៏ជាម្ចាស់ផ្លាកលេខ O9 ដែលបានទិញក្នុងតម្លៃជិត ២,៦លានដុល្លារ
២. ផ្លាកលេខ AA8 តម្លៃ ៩,៥លានដុល្លារ និងផ្លាកលេខ AA9 តម្លៃ ១០,៣លានដុល្លារ
AA8 និង AA9 ជាផ្លាកលេខថ្លៃចំនួនពីរក្នុងទីក្រុងឌុយបៃ។ ក្នុងកម្មវិធីដេញថ្លៃសប្បុរសធម៌មួយកាលពីឆ្នាំ២០២២ សេដ្ឋីអចលនទ្រព្យឈ្មោះថា Balvinder Sahni បានចំណាយ ៩,៥លានដុល្លារ ទិញយកផ្លាកលេខ AA8 ហើយកាលពីឆ្នាំ២០២១ ក៏មានការដាក់លក់ដេញថ្លៃផ្លាកលេខ AA9 ដែលលក់បាន ១០,៣លានដុល្លារ។
៣. ផ្លាកលេខ 1 តម្លៃ ១៤,២លានដុល្លារ
Syed Abdul Ghaffar Khoury ដែលជាសេដ្ឋីឌុយបៃ គឺជាម្ចាស់ផ្លាកលេខដ៏ពិសេស “1”។ ដោយហេតុតែចង់លេចធ្លោជាងគេ បុរសរូបនេះមិនញញើតនឹងចំណាយទឹកប្រាក់ ១៤,២លានដុល្លារ ដើម្បីទិញផ្លាកលេខ “1” ដាក់លើរថយន្ត Bugatti Veyron 16.4 Pegaso Edition របស់ខ្លួនឡើយ។
៤. ផ្លាកលេខ P7 តម្លៃ ១៤,៩លានដុល្លារ
កាលពីខែមេសា ឆ្នាំ២០២៣នេះ មហាសេដ្ឋីក្នុងសហភាពអារ៉ាប់រួម បានចំណាយទឹកប្រាក់ជិត ១៥លានដុល្លារ ទិញយកផ្លាកលេខអក្សរ P និងមានលេខ 7 សម្រាប់រថយន្ត Bugatti របស់ខ្លួន។ យ៉ាងណាក្ដី មួយខែក្រោយមក គេបានឃើញផ្លាកលេខនេះលើរថយន្ត Tesla Model 3 ទៅវិញ ហើយថ្មីៗនេះ ផ្លាកលេខនេះបានស្ថិតលើរថយន្ត Rolls-Royce Cullinan Mansory Edition។
៥. ផ្លាកលេខ F1 តម្លៃ ២០លានដុល្លារ
ផ្លាកលេខ F1 បច្ចុប្បន្នបានកាន់កាប់ដោយអ្នកច្នៃម៉ូតរថយន្តល្បីឈ្មោះ Afzal Kahn ដោយដើមឡើយរូបលោកបានទិញផ្លាកលេខនេះក្នុងតម្លៃ ៥,៣លានដុល្លារ ប៉ុណ្ណោះ ប៉ុន្តែតម្លៃរបស់វាបានកើនឡើងដល់ ២០លានដុល្លារ។ ផ្លាកលេខពិសេសនេះ ត្រូវបានបំពាក់លើរថយន្ត Bugatti Veyron Super Sport។
៦. ផ្លាកលេខ MM តម្លៃ ២៤,៣លានដុល្លារ
ជាមួយតម្លៃរហូតដល់ ២៤,៣លានដុល្លារ ផ្លាកលេខសម្រាប់រដ្ឋកាលីហ្វ័រញ៉ាដែលមានអក្សរ MM គឺជាផ្លាកលេខថ្លៃជាងគេបំផុតលើលោក។ ផ្លាកលេខដែលមានអក្សរពីរតួ គឺពិបាកនឹងស្វែងរកនៅសហរដ្ឋអាមេរិកណាស់ ជាពិសេសផ្លាកលេខដែលមានអក្សរពីរដូចគ្នា៕
ប្រភព ៖ Xehay