[ទីផ្សារបរទេស] រថយន្ត Ford Ranger ប្រភេទ PHEV ដំបូងគេបានប្រកាសចេញជាផ្លូវការសម្រាប់ទីផ្សារអឺរ៉ុប ដោយគ្រោងនឹងចូលរោងចក្រផលិតនៅចុងឆ្នាំនេះ ជាមួយការដឹកជញ្ជូនអាចនឹងចាប់ផ្ដើមនៅខែមករា ឆ្នាំ២០២៤ ខាងមុខនេះ។
រថយន្ត Ranger PHEV ដែលនឹងជាស៊េរីឆ្នាំ២០២៥នេះ មានបំពាក់ប្រព័ន្ធម៉ាស៊ីន ២,៣លីត្រ ៤ស៊ីឡាំង ប្រភេទ Turbocharged ជាមួយម៉ូទ័រអគ្គិសនីចំនួនមួយ និងអាគុយតូចមួយ។ Ford មិនបានប្រាប់ឲ្យដឹងអំពីកម្លាំងនៃរថយន្តនេះ ប៉ុន្តែបានអះអាងថាវាមានកម្លាំងបង្វិលខ្លាំងជាងរថយន្ត Ranger ដទៃទៀតដែលកំពុងផលិត។
Ford បាននិយាយថា រថយន្តនេះអាចបើកបរដោយប្រើប្រាស់ថាមពលអគ្គិសនីសុទ្ធ បានចម្ងាយដល់ ៤៥គ.ម សម្រាប់ការសាកពេញមួយលើក ហើយវាក៏មានមុខងារ Pro Power Onboard ដែលមានរន្ធសម្រាប់ដោតប្រើប្រាស់ឧបករណ៍ផ្សេងៗនៅផ្នែកគូថក្រោយរថយន្ត។
សម្រាប់រូបរាងវិញ ហាក់មិនមានភាពខុសប្លែកគ្នាខ្លាំងឡើយរវាងរថយន្ត PHEV នេះ ជាមួយរថយន្ត Ranger ដែលប្រើប្រាស់ម៉ាស៊ីនប្រេងឥន្ធនៈសុទ្ធ អ្វីដែលខុសប្លែកខ្លាំងគឺត្រង់ថារថយន្ត PHEV នេះមានកន្លែងសម្រាប់សាកភ្លើងនៅផ្នែកខាងក្រោយ អមជាមួយយ៉ាន់កង់ដែលមានការឌីហ្សាញថ្មី។
គួរដឹងថា Ranger PHEV នឹងចេញលក់ជាមួយ Option Wildtrak ជាមុនសិន ដោយ Option ដទៃទៀតនឹងបញ្ចេញមកតាមក្រោយ៕
ប្រភព ៖ Motor1