[ទីផ្សារបរទេស] ក្រោយពីបានប្រកាសអំពីរោងចក្រផលិតរថយន្តអគ្គិសនីថ្មីដែលនឹងចាប់ផ្ដើមបញ្ចេញរថយន្តស៊េរីថ្មីនៅឆ្នាំ២០២៦រួចមក ក្រុមហ៊ុន Toyota បានបង្ហាញព័ត៌មានអំពីអាគុយថ្មី និងទំនើប ដែលនឹងត្រូវប្រើលើរថយន្តអគ្គិសនីជំនាន់ថ្មីរបស់ខ្លួន។
ក្រុមហ៊ុនរថយន្តជប៉ុននេះ នឹងពឹងផ្អែកលើអាគុយជំនាន់ថ្មីចំនួន៤ប្រភេទ ដោយក្នុងនោះមានចំនួន៣ មានប្រើប្រាស់អាគុយអេឡិចត្រូតបច្ចេកវិទ្យាថ្មី និងមួយទៀតគឺប្រើប្រាស់បច្ចេកវិទ្យាអាគុយស្ងួត។
Toyota និយាយថាអាគុយទាំងនេះ នឹងប្រើប្រាស់លើរថយន្តអគ្គិសនី ១,៧លានគ្រឿង នៃរថយន្ត ៣,៥លានគ្រឿង ដែលក្រុមហ៊ុនរំពឹងថានឹងលក់បាននៅទូទាំងពិភពលោក ត្រឹមឆ្នាំ២០៣០។ អាគុយដែលប្រើបច្ចេកវិទ្យាទំនើប នឹងជាចំណុចមួយដែលអាចទាក់ទាញអតិថិជនជារួម។
ចាប់ផ្ដើមជាមួយអាគុយលីចួមថាមពលខ្លាំង (Performance Li-Ion Battery) គ្រោងនឹងដាក់ប្រើលើរថយន្តអគ្គិសនីរបស់ Toyota ចាប់ពីឆ្នាំ២០២៦ ដោយវាអាចផ្ដល់ចម្ងាយបើកបរបានដល់ ៨០០គ.ម ជាមួយការជួយពីសមត្ថភាពជ្រែកខ្យល់ប្រសើរជាងមុននៃរថយន្ត និងការបន្ថយទម្ងន់រថយន្តឲ្យស្រាលជាងមុន។
អាគុយថ្មីប្រភេទនេះក៏រំពឹងថានឹងជួយកាត់បន្ថយការចំណាយលើការផលិតបាន ២០% បើធៀបនឹងរថយន្តអគ្គិសនី Toyota bZ4X នាពេលបច្ចុប្បន្ន ជាមួយការសាកភ្លើងពី ១០% ទៅ ៨០% ចំណាយពេលត្រឹម ២០នាទី ឬតិចជាងនេះ។
ចូលដល់ចុងឆ្នាំ២០២៦ ឬដើមឆ្នាំ២០២៧ Toyota នឹងចាប់ផ្ដើមប្រើប្រាស់អាគុយប្រភេទ Popularization LFP Battery ជាអាគុយមានតម្លៃធូរថ្លៃ ដោយរំពឹងថាកាត់បន្ថយថ្លៃចំណាយបានដល់ ៤០% ធៀបនឹង Toyota bZ4X ប៉ុន្តែអាចបើកបរបានឆ្ងាយជាងមុន ២០% ជាមួយការសាកភ្លើងពី ១០% ទៅ ៨០% ចំណាយពេល ៣០នាទី ឬតិចជាងនេះ។
ឆ្ពោះចូលឆ្នាំ២០២៧ ដល់ឆ្នាំ២០២៨ នឹងលេចវត្តមានអាគុយជំនាន់ថ្មីទីបី ដែលអាចផ្ដល់ចម្ងាយបើកបរបានដល់ ១០០០គ.ម និងចំណាយពេល ២០នាទី ដើម្បីសាកភ្លើងពី ១០% ទៅ ៨០%។
នៅឆ្នាំ២០២៧ និងឆ្នាំ២០២៨ ដដែល Toyota គ្រោងបង្ហាញចេញអាគុយស្ងួតដំបូងរបស់ខ្លួនសម្រាប់ប្រើលើរថយន្តអគ្គិសនី ដែលអាចបើកបរបានដល់ចម្ងាយ ១០០០គ.ម និងចំណាយពេលសាកភ្លើងពី ១០% ទៅ ៨០% ក្នុងពេលត្រឹមតែ ១០នាទីប៉ុណ្ណោះ។
បន្ថែមពីនេះ Toyota បានឲ្យដឹងថា មានអាគុយស្ងួតមួយប្រភេទទៀតដែលកំពុងស្ថិតក្រោមការអភិវឌ្ឍន៍ ដែលកំណត់គោលដៅបង្កើនចម្ងាយបើកបរឲ្យបានដល់ ១២០០គ.ម ឯណោះ៕
ប្រភព ៖ Motor1