[ទីផ្សារបរទេស] រថយន្តតួខ្ពស់បានសម្រេចសមិទ្ធផលថ្មីមួយនៅអឺរ៉ុប ដោយក្នុងរយៈពេល៦ខែដំបូង រថយន្តប្រភេទនេះបានកាន់កាប់ចំណែកទីផ្សារលើសពី ៥០% ជាលើកដំបូង មិនធ្លាប់មានពីមុនមក។
ជាក់ស្ដែង ចំណែកទីផ្សារនៃរថយន្តតួខ្ពស់ SUV និង Crossover បានកើនឡើងដល់ ៥១% ខណៈដែលឆមាសដំបូងនៃឆ្នាំ២០២២ចំណែកទីផ្សារនៃរថយន្តប្រភេទនេះគឺមានចំនួន ៤៨%។
តួលេខនៃការលក់រថយន្ត SUV សរុបលើទីផ្សារអឺរ៉ុបដែលប្រមូលបានដោយក្រុមហ៊ុនស្រាវជ្រាវទីផ្សារ Dataforce បង្ហាញថា ចំនួនលក់មានការកើនឡើង ២៣% ធៀបនឹងឆមាសដំបូងនៃឆ្នាំ២០២២ ដោយឈានដល់ចំនួន ៣,៣៧លានគ្រឿង។
ក្រឡេកមើលរថយន្ត SUV ដែលពេញនិយមជាងគេគឺរថយន្ត Tesla Model Y ដែលលក់បាន ១៣៨ ១៥២គ្រឿង កើនឡើង ២០៧%។ រថយន្ត SUV មួយទៀត ដែលអាចលក់បានជាង១០ម៉ឺនគ្រឿង គឺរថយន្ត Volkswagen T-Roc លក់បាន ១០៤ ៤៦៥គ្រឿង កើនឡើង ៣២%។
ចំណាត់ថ្នាក់ទីបីគឺបានទៅលើរថយន្ត Toyota Yaris Cross លក់បាន ៩៦ ៨៤៩គ្រឿង កើនឡើង ៤៩%។ នៅចំណាត់ថ្នាក់បន្តបន្ទាប់គឺរថយន្ត VW Tiguan, Dacia Duster, Hyundai Tucson, Peugeot 2008, Kia Sportage, Renault Captur និងចុងក្រោយគឺ Ford Puma៕
ប្រភព ៖ Motor1