ក្រៅពីការការរំពឹងថា Apple នឹងប្រកាសចេញ iPhone 15, Apple Watch 9, Apple Watch Ultra 2 និង AirPods Pro 2 ប្រើរន្ធសាកថ្មី USB-C គឺគេមិនរំពឹងថាផលិតផលទាំង ៥ ខាងក្រោមនេះប្រកាសចេញឡើយ៖
១. ឈីបខ្លាំង M3 គេរំពឹងថាវានឹងប្រកាសចេញនាឆ្នាំក្រោយ ត្បិត Apple កំពុងសំងំអភិវឌ្ឍកុំព្យូទ័រនិងឡេបថប Mac នានាសម្រាប់បំពាក់ជាមួយបន្ទះឈីបខ្លាំងមួយនេះ។
២. iPad ជំនាន់ថ្មី គេរំពឹងថា Apple នឹងបញ្ចេញម៉ូដែល iPad Pro ដែលដំណើរការដោយឈីប M3 ខាងលើ ជាមួយនឹងអេក្រង់ OLED និងមានការរចនា Magic Keyboard ថ្មីផងដែរ។ គេរំពឹងថា វាអាចនឹងប្រកាសចេញនៅ ឆ្នាំ២០២៤។ អ្នកវិភាគបានលើកឡើងដែរថា ម៉ូឌែល iPad mini នឹងបញ្ចេញនា ឆ្នាំ២០២៤ ផងដែរ។ ងាកមក iPad Air វិញ លេចដំណឹងថា Apple កំពុងអភិវឌ្ឍ iPad Air កន្លងមក គេរំពឹងថានឹងប្រកាសចេញ នាចុងឆ្នាំ២០២៣ នាខែតុលា។
៣. iPhone SE 4 មានដំណឹងជាប់ពីម៉ូឌែលនេះជានិច្ច ប៉ុន្ដែគេរំពឹងថាវាមិនទាន់ចេញពេលនេះនៅឡើយទេ។ ពាក្យចចាមអារ៉ាមចុងក្រោយបង្អស់ បង្ហាញថា iPhone SE នឹងមានលក្ខណៈស្រដៀងទៅនឹង iPhone 14 ដែលមានការរចនាដកប៊ូតុង Home ចេញប្រើអេក្រង់ទាំងអស់ ដោយនឹងប្រើមុខងារ Face ID ប្រើរន្ធ USB-C មានកាមេរ៉ាខាងក្រោយតែមួយ និងប៊ូតុង “Action” ដើម្បីជំនួសការបិទឬបើកសំឡេង។
៤. ឧបករណ៍ពាក់ក្បាល Vision Pro កំពូលឧបករណ៍ VR និង AR មួយនេះនឹងមិនទាន់ប្រកាសចេញនោះទេ ត្បិត Apple បានបញ្ជាក់ក្នុង WWDC 2023 ពេលវាដាក់បង្ហាញនោះថា នឹងដាក់លក់នៅដើម ឆ្នាំ២០២៤៕
៥. HomePod mini ជំនាន់ទី២ អ្នកទស្សន៍ទាយពីបច្ចេកវិទ្យា លោក Ming-Chi Kuo បាននិយាយថា Apple នឹងនាំចេញឧបករណ៍បំពងសំឡេងនេះចូលទីផ្សារ នាពាក់កណ្ដាល ឆ្នាំ២០២៤៕