Apple ទើបបញ្ចេញកំណែអាប់ឌែត iOS 16.6.1 ដើម្បីរាំងខ្ទប់មេរោគចារកម្ម Pegasus spyware ដែលត្រូវបានរាយការណ៍ដោយ មន្ទីរស្រាវជ្រាវ The Citizen Lab។
មន្ទីរស្រាវជ្រាវនេះបានរកឃើញថា Pegasus spyware មានលទ្ធភាព ដំណើរការកូដតាមអំពើចិត្ត និងឈានដល់ការគ្រប់គ្រងឧបករណ៍អ្នកប្រើ ឬហៅថា “Blastpass” ដោយអ្នកប្រើមិនចាំបាច់មានសកម្មភាពអ្វីឡើយ។
ប្រសិទ្ធភាពនៃមេរោគនេះ គឺវាអាចតាមដានអ្នកប្រើ ដូចជាគ្រប់គ្រងទូរសព្ទអ្នកប្រើទាំងមូល (take full control) អាចអានការឆ្លើយឆ្លងគ្នាដោយសម្ងាត់ ស្ដាប់ការសន្ទនាតាមទូរសព្ទ រួមទាំងអាចចូលមើលរូបថតឬវីដេអូរបស់អ្នកប្រើបានថែមទៀតផង។
បញ្ហាងាយរងគ្រោះលើ iOS នោះពាក់ព័ន្ធនឹង PassKit – និង Apple SDK ដែលអនុញ្ញាតឱ្យអ្នកអភិវឌ្ឍន៍កម្មវិធី បញ្ចូល Apple Pay ទៅក្នុងកម្មវិធីរបស់ពួកគេ និងរូបភាពផ្សេងៗដែលបានផ្ញើតាមរយៈ iMessage ដើម្បីបង្កឱ្យមានការលុកលុយក្នុងទូរសព្ទ។
ដូចនេះអ្នកប្រើកុំបារម្ភ ដើម្បីជៀសវាងបញ្ហាទាំងនេះអាចកើតឡើងជាយថាហេតុ អ្នកអាចអាប់ឌែតទៅកាន់កំណែប្រែចុងក្រោយបង្អស់ iOS 16.6.1។
គួរដឹងថា Pegasus spyware ត្រូវបានបង្កើតដោយអង្គការ ក្រុមហ៊ុនអ៊ីស្រាអែល NSO Group ដែលប្រើសម្រាប់ភ្នាក់ងារអនុវត្តច្បាប់ និងសេវាកម្មស៊ើបការណ៍។ វាត្រូវបានគេប្រើយ៉ាងទូលំទូលាយដើម្បីស៊ើបអង្កេតមនុស្សនៃប្រទេសផ្សេងៗដោយសម្ងាត់ ជាពិសេសគឺមន្រ្តីរដ្ឋាភិបាល សកម្មជន អ្នកនយោបាយ អ្នកកាសែត នាយកប្រតិបត្តិក្រុមហ៊ុនជាដើម។
ព្រោះតែកម្មវិធីមេរោគនេះមានតម្លៃថ្លៃ ដូចនេះ វាមិនចេះតែចម្លង ឬចូលទៅស៊ើបការណ៍ទូរសព្ទទូទៅផ្ដេសផ្ដាសនោះឡើយ គឺវាសំដៅទៅចំពោះបុគ្គលណាដែលជាគោលដៅស៊ើបការណ៍តែប៉ុណ្ណោះ៕