បន្ទាប់ពីមានគម្រោងពង្រឹងសមត្ថភាពផ្នែក Software ក៏ដូចជាធនធានមនុស្សរបស់ខ្លួន ពេលនេះ ក្រុមហ៊ុន Nvidia ដែលជាក្រុមហ៊ុនបច្ចេកវិទ្យាដែលមានតម្លៃទីផ្សារធំជាងគេបំផុតនៅក្នុងពិភពលោក បាន និងកំពុងពិចារណាធ្វើការទិញយកក្រុមហ៊ុន AI startup មួយ ឈ្មោះថា AI21 Labs របស់ប្រទេសអ៊ីស្រាអែលហើយ ដែលក្នុងនោះ គឺអាចនឹងមានតម្លៃចន្លោះពី 2 ទៅ 3 ពាន់លានដុល្លារឯណ្ណោះ។ នេះបើយោងតាម Calcalist ។
ក្នុងនោះ ចំពោះចំណាប់អារម្មណ៍សំខាន់របស់ក្រុមហ៊ុន Nvidia ទៅលើក្រុមហ៊ុន AI21 Labs គឺក្រុមបុគ្គលិក AI21 ប្រហែល 200 នាក់ ដែលភាគច្រើនមានការអប់រំកម្រិតខ្ពស់ និងមានជំនាញកម្រនៅក្នុងការអភិវឌ្ឍ AI ។
គួរបញ្ជាក់ថា ក្រុមហ៊ុន AI21 Labs គឺជាក្រុមហ៊ុន AI startup មួយរបស់ប្រទេសអ៊ីស្រាអែលដែលបង្កើតឡើងនៅឆ្នាំ 2017 ដោយ Amnon Shashua ។ ក្រុមហ៊ុននេះ គឺផ្តោតលើបញ្ញាសិប្បនិម្មិតផ្នែកភាសា (Language AI) ។
ក្រៅពីនេះ ក្រុមហ៊ុន Nvidia ផ្ទាល់ក៏កំពុងពង្រីកវត្តមានរបស់ខ្លួននៅអ៊ីស្រាអែល ដោយគ្រោងនឹងសាងសង់នូវមជ្ឈមណ្ឌលស្រាវជ្រាវ និងអភិវឌ្ឍន៍ដ៏ធំមួយ ដែលអាចផ្តល់ការងារដល់បុគ្គលិករហូតដល់ 10,000 នាក់ផងដែរ៕