ចូលដល់ពាក់កណ្ដាលចុងឆ្នាំ២០២៣ មានក្រុមហ៊ុនរថយន្តជាច្រើនបានចាប់ផ្ដើមបង្ហាញចេញរថយន្តស៊េរីឆ្នាំ២០២៤ ប៉ុន្តែមានរថយន្តប៉ុន្មានម៉ូដែលមិនមានជាស៊េរីឆ្នាំ២០២៤ឡើយ ដោយហេតុថានឹងត្រូវបញ្ឈប់ការផលិត។
Audi R8
ការផលិតរថយន្ត R8 នឹងត្រូវបញ្ចប់បន្ទាប់ពីបានរស់រានរយៈពេល១៦ឆ្នាំ និងបានចេញលក់លើទីផ្សារបានចំនួនពីរជំនាន់ ដោយរថយន្តម៉ូដែលចុងក្រោយរបស់វាគឺរថយន្ត R8 GT RWD ស៊េរីឆ្នាំ២០២៣។
Audi TT
រថយន្តស្ព័រ Audi TT នឹងត្រូវអស់អាយុត្រឹម២៥ឆ្នាំ ដោយអតិថិជននៅអង់គ្លេសនឹងបានឃើញម៉ូដែលចុងក្រោយឈ្មោះថា Final Edition សម្រាប់ឆ្នាំ២០២៣ ខណៈដែលម៉ូដែល RS Heritage Edition នឹងជាម៉ូដែលចុងក្រោយសម្រាប់អតិថិជននៅអាមេរិក។
Ford Fiesta
ត្បិតថា Ford មិនបានដាក់លក់រថយន្ត Fiesta នៅអាមេរិកតាំងពីឆ្នាំ២០១៩ ប៉ុន្តែជំនាន់ទី៧ នៃរថយន្តនេះមានលក់នៅអឺរ៉ុប ហើយពេលនេះវាត្រូវបញ្ចប់ការផលិតជាផ្លូវការហើយ។ Ford គ្រោងយករថយន្ត Puma ប្រភេទអគ្គិសនីមកជំនួសតំណែងរថយន្តនេះ។
Mazda CX-9
រថយន្តកៅអីបីជួរ CX-9 នឹងបាត់មុខពីទីផ្សារអាមេរិកបន្ទាប់ពីម៉ូដែលឆ្នាំ២០២៣ ដោយរថយន្ត CX-90 នឹងជាអ្នកចូលមកជំនួសតំណែង។ CX-90 មានទំហំទូលាយជាង មានម៉ាស៊ីនខ្លាំងក្លាជា ហើយក៏ជារថយន្តកៅអីបីជួរដំបូងរបស់ Mazda ដែលមានជម្រើស PHEV អាចបើកដោយប្រើអគ្គិសនីសុទ្ធបានចម្ងាយជិត ៤២គ.ម។
Mazda MX-30
រថយន្ត Mazda មួយម៉ូដែលទៀតដែលនឹងមិនមានជាស៊េរីឆ្នាំ២០២៤ សម្រាប់អតិថិជនសហរដ្ឋអាមេរិកគឺរថយន្តអគ្គិសនីខ្នាតតូច MX-30។ ជាមួយតម្លៃចាប់ពី ៣៤ ៦៤៥ដុល្លារ វាផ្ដល់ចម្ងាយបើកបរបានត្រឹម ១៦០គ.ម ដែលតិចជាងគូប្រជែងដទៃទៀត៕
ប្រភព ៖ Motor1