កាលពីថ្មីៗនេះ វិបសាយផ្លូវការរបស់ Toyota Vietnam បានធ្វើការផ្លាស់ប្ដូរតម្លៃលក់រាយនៃរថយន្តដ៏ពេញនិយម Corolla Cross។
ក្នុងនោះ ម៉ូដែល Corolla Cross ប្រភេទ 1.8G មានតម្លៃ ៧៦០លានដុង ដែលស្មើប្រមាណ ៣១ ៦០០ដុល្លារ ជាការកើនឡើង ៥លានដុង ឬ ២០០ដុល្លារ ធៀបនឹងតម្លៃពីមុន។ សម្រាប់ប្រភេទពីរផ្សេងទៀតគឺ 1.8V និង 1.8HV មិនមានផ្លាស់ប្ដូរតម្លៃនោះទេ ដោយនៅរក្សាតម្លៃ ៣៥ ៧៥០ដុល្លារ និងតម្លៃ ៣៦ ៧០០ដុល្លារ ដដែល។
គិតចាប់តាំងពីថ្ងៃទីដាក់លក់មក រថយន្ត Toyota Corolla Cross បានកើនឡើងតម្លៃ ៤ដងហើយ ដោយក្នុងនោះ ប្រភេទ 1.8G បានកើនឡើងតម្លៃសរុបប្រមាណ ១ ៦៦០ដុល្លារ។
ជាមួយតម្លៃចាប់ពី ៣១ ៦០០ដុល្លារ ធ្វើឲ្យ Corolla Cross ក្លាយជារថយន្តដ៏មានតម្លៃខ្ពស់មួយធៀបនឹងគូប្រជែង ដោយ Mazda CX-30 មានតម្លៃចាប់ពី ២៩ ៥០០ដុល្លារ, Hyundai Creta មានតម្លៃចាប់ពី ២៦ ៦០០ដុល្លារ និង Kia Seltos មានតម្លៃចាប់ពី ២៤ ៩០០ដុល្លារ។
គួរដឹងថា Toyota មិនបានប្រាប់ពីហេតុផលនៃការឡើងថ្លៃនេះទេ ប៉ុន្តែភ្នាក់ងារចែកចាយរថយន្ត Toyota បានបកស្រាយថា ការកែប្រែតម្លៃនេះគឺដើម្បីត្រៀមសម្រាប់ការចេញលក់រថយន្ត Yaris Cross នាពេលខាងមុខ៕
ប្រភព ៖ Xehay