(ទីក្រុងចាកាតា)៖ លោកប្រធានាធិបតីឥណ្ឌូនេស៊ី Joko Widodo បានអោយដឹងថា ប្រទេសឥណ្ឌូនេស៊ីបានទទួលការដឹកជញ្ជូនទី១ នៃវ៉ាក់សាំងការពារកូវីដ១៩ ពីប្រទេសចិនកាលពីថ្ងៃអាទិត្យ ទី៦ ខែធ្នូ កន្លងទៅនេះ ហើយរដ្ឋាភិបាលបាននឹងកំពុងរៀបចំការចាក់ថ្នាំបង្ការជាលក្ខណះទ្រង់ទ្រាយធំផងដែរ។
លោក Jokowi (Joko Widodo) ត្រូវបានគេស្គាល់ជាទូរទោថាជាប្រធានាធិបតី ឥណ្ឌូនេស៊ី បានមានប្រសាសន៌តាមរយៈ អនឡាញ (Online) ថាឥណ្ឌូនេស៊ី បានទទួលវ៉ាក់សាំងការពារ Sinovac Biotech ចំនួន ១,២លានដុស ពីប្រទេសចិន ដែលជាវ៉ាក់សាំងបានធ្វើតេសន៌សាកល្បងកាលពីខែសីហា កន្លងទៅ។ លោកបានបន្ថែមទៀតដែរថា ប្រទេសរបស់លោកនឹងទទួលបានវ៉ាក់សាំងបន្ថែមទៀតចំនួន ១,៨លានដុស នៅដើមខែមករា ឆ្នាំក្រោយនេះ។
ការសាកល្បងដំណាក់កាលចុងក្រោយនៃវ៉ាក់សាំង Sinovac ក៏កំពុងដំណើរការនៅក្នុងប្រទេសប្រេស៊ីល និងតួកគីផងដែរដោយមានលទ្ធផលបណ្តោះអាសន្នស្តីពីប្រសិទ្ធភាព ពីប្រេស៊ីលដែលរំពឹងទុកនៅពាក់កណ្តាលខែធ្នូនេះ។
ឥណ្ឌូនេស៊ី ក៏រំពឹងថានឹងទទួលបានវត្ថុធាតុដើម សម្រាប់ផលិតវ៉ាក់សាំងការពារនេះចំនួន ១៥លានដុស នៅខែនេះ និងចំនួន ៣០លាន បន្ថែមទៀតនៅខែក្រោយ នេះបើតាមប្រសាសន៌លោកប្រធានាធិបតី។
លោក Jokowi បាននិយាយថាវ៉ាក់សាំងនេះ ក៏ត្រូវវាយតម្លៃដោយទីភ្នាក់ងារស្បៀងអាហារ និងថ្នាំ (BPOM) របស់ប្រទេសឥណ្ឌូនេស៊ី ខណៈរដ្ឋបាលរបស់លោកនៅតែបន្តត្រៀមសម្រាប់ចែកចាយវ៉ាក់សាំងនេះ នៅទូទាំងប្រជុំកោះដែលមានប្រជាជនចំនួន ២៧០ លាននាក់។
លោកបានមានប្រសាសន៍ថា “ យើងបានត្រៀមជាច្រើនខែ តាមរយៈការសាកល្បងនៅក្នុងខេត្តមួយចំនួនរបស់យើង ហើយខ្ញុំប្រាកដណាស់ថានៅពេលដែលយើងសំរេចថាអាចប្រើបានហើយនោះ យើងអាចចាប់ផ្តើមចាក់វ៉ាក់សាំង ដោយសារយើងបានត្រៀមរួចរាល់” ។
ចំនួនអ្នកឆ្លងកូវីដ១៩ ប្រចាំថ្ងៃរបស់ឥណ្ឌូនេស៊ីបានកើនឡើងក្នុងប៉ុន្មានសប្តាហ៍ថ្មីៗនេះ ដោយមានករណីឆ្លងសរុបកើនឡើងដល់ ៥៧៥ ៧៩៦ករណី កាលពីថ្ងៃអាទិត្យ និងមានអ្នកស្លាប់ចំនួន ១៧ ៧៤០នាក់ដែលជាចំនួនខ្ពស់ជាងគេបំផុតនៅអាស៊ីអាគ្នេយ៍។