ប្រទេសឥណ្ឌូនេស៊ី បានបង្ហាញចេញនូវផែនការថ្មីមួយរបស់ខ្លួន ដោយមានគោលបំណងបញ្ចប់ការនាំចូលប្រេងម៉ាស៊ូតពីបរទេសនៅឆ្នាំ ២០២៦ ខាងមុខនេះ។ ផែនការនេះ ត្រូវបានចាត់ទុកថាជាជំហានដ៏សំខាន់ក្នុងការពង្រឹងសន្តិសុខថាមពលជាតិ និងកាត់បន្ថយការពឹងផ្អែកលើប្រេងឥន្ធនៈនាំចូល។
ក្នុងគម្រោងនេះ រដ្ឋាភិបាលឥណ្ឌូនេស៊ីផ្ទាល់ មានផែនការពង្រីកសមត្ថភាពរោងចក្រចម្រាញ់ប្រេងក្នុងស្រុក ព្រមទាំងជំរុញការប្រើប្រាស់ប្រេងម៉ាស៊ូតជីវសាស្ត្រ ដែលផលិតពីប្រេងដូងក្នុងស្រុក។ វាមិនត្រឹមតែជួយសន្សំប្រាក់ចំណាយរបស់រដ្ឋប៉ុណ្ណោះទេ ប៉ុន្តែក៏ថែមទាំងជួយបង្កើនប្រាក់ចំណូលដល់កសិករ និងលើកកម្ពស់ឧស្សាហកម្មថាមពលកកើតឡើងវិញផងដែរ។
ជាមួយនឹងយុទ្ធសាស្ត្រថ្មីនេះ ឥណ្ឌូនេស៊ី មានគោលដៅធ្វើឲ្យប្រទេសខ្លួនក្លាយជាមជ្ឈមណ្ឌលផលិតថាមពលដែលមានមូលដ្ឋានលើប្រេងដូង ទាំងក្នុងតំបន់ និងលើឆាកអន្តរជាតិ ដោយផ្តោតសំខាន់លើការអភិវឌ្ឍប្រកបដោយចីរភាព ការកាត់បន្ថយការបំភាយឧស្ម័ន និងការការពារបរិស្ថាន៕