បន្ទាប់ពីមានការរង្គោះរង្គើនៅក្នុងទីផ្សារអង្គផ្ទុកទិន្នន័យក្នុងរយៈពេលចុងក្រោយនេះ ពេលនេះ ក្រុមហ៊ុន Samsung ត្រូវបានគេរាយការណ៍ថា កំពុងរៀបចំផែនការបញ្ចប់អាជីវកម្មផលិត និងលក់ SSD ប្រភេទ SATA របស់ខ្លួនហើយ។ ព័ត៌មាននេះ បានបង្កឲ្យមានការព្រួយបារម្ភ និងផលប៉ះពាល់យ៉ាងខ្លាំងដល់ទីផ្សារអង្គផ្ទុកទិន្នន័យនាពេលបច្ចុប្បន្ននេះ។
យោងតាមរបាយការណ៍នាពេលថ្មីៗនេះ មូលហេតុសំខាន់នៃការគ្រោងនឹងចាកចេញពីទីផ្សារ SATA SSD នេះ គឺដោយសារពួកគេចង់ផ្តោត និងងាកការធ្វើផលិតកម្មទៅលើឈីប HBM (High Bandwidth Memory) សម្រាប់វិស័យ AI ជំនួសវិញ។ បច្ចុប្បន្ន ឈីប HBM កំពុងមានតម្រូវការខ្ពស់យ៉ាងខ្លាំងពីក្រុមហ៊ុនបច្ចេកវិទ្យាធំៗជាច្រើននៅលើពិភពលោក ដើម្បីប្រើប្រាស់ក្នុងការបណ្តុះបណ្តាល AI និងប្រតិបត្តិការនៅក្នុង Data Center។
គួរបញ្ជាក់ផងដែរថា ទោះបីជាទីផ្សារ SATA SSD មិនមានការរីកចម្រើនខ្លាំងដូច SSD ប្រភេទ NVMe ក៏ដោយ ក៏ប៉ុន្តែវានៅតែមានប្រជាប្រិយភាពខ្ពស់ក្នុងចំណោមអ្នកប្រើប្រាស់ដែលចង់ធ្វើការ Upgrade និងមានថវិកាក្នុងចំនួនកំណត់។ ដូច្នេះ ប្រសិនបើ Samsung ពិតជាបញ្ចប់អាជីវកម្មនេះមែន នោះវាអាចនឹងធ្វើឲ្យមានការផ្គត់ផ្គង់ថយចុះ និងការកើនឡើងតម្លៃជាខ្លាំងនៅក្នុងរយៈពេលខាងមុខ៕