[ឥណ្ឌូនេស៊ី] អតិផរណានៅក្នុងប្រទេសឥណ្ឌូនេស៊ីបានធ្លាក់ចុះក្នុងខែតុលា ដោយសារតម្លៃម្ហូបអាហារធ្លាក់ចុះ ជាពិសេសម្ទេស។ កាលពីខែមុន អតិផរណារបស់ប្រទេសឥណ្ឌូណេស៊ីមានចំនួន ៥,៧១% ដែលទាបជាងក្នុងខែកញ្ញាកម្រិតជិត ៦% និងទាបជាងការព្យាកររបស់អ្នកវិភាគ។ តម្លៃអាហារបានកើនឡើង ៧,០៤ ភាគរយពីមួយឆ្នាំទៅមួយឆ្នាំ ទាបជាងការកើនឡើងនៅខែកញ្ញា ៨,៦៩ ភាគរយ ខណៈតម្លៃថាមពលបានកើនឡើង ១៧%។
ក្នុងនោះអាហារជាច្រើនប្រភេទក្នុងរដូវប្រមូលផល និងការអន្តរាគមន៍ពីរដ្ឋាភិបាលបានជួយទម្លាក់តម្លៃស៊ុត បសុបក្សី និងម្ទេស ដែលជាគ្រឿងផ្សំសំខាន់ៗនៅក្នុងម្ហូបឥណ្ឌូនេស៊ី ខណៈតម្លៃម្ហូបអាហារបានធ្លាក់ចុះបីខែជាប់គ្នា។
លោក Brian Tan សេដ្ឋវិទូនៅ Barclays បាននិយាយថា “សម្ពាធលើតម្លៃម្ហូបអាហារបានថយចុះគួរឱ្យកត់សម្គាល់ ដែលបង្ហាញថាអតិផរណាអាចចុះលឿនជាងការរំពឹងទុក” ។ Barclays បានទម្លាក់ការព្យាករណ៍អតិផរណារបស់ខ្លួនសម្រាប់ប្រទេសឥណ្ឌូនេស៊ីក្នុងឆ្នាំនេះមកត្រឹម ៤,២% ពី ៤,3% ពីមុន។
បើធៀបនឹងខែមុន តម្លៃទំនិញប្រើប្រាស់ក្នុងសេដ្ឋកិច្ចធំជាងគេរបស់អាស៊ីអាគ្នេយ៍បានធ្លាក់ចុះ ០,១១%។ ការដកប្រាក់ឧបត្ថម្ភថ្លៃប្រេងឥន្ធនៈបានបណ្តាលឱ្យមានការកើនឡើង ០,៣៥% នៃថ្លៃដឹកជញ្ជូន។ ទោះជាយ៉ាងណាក៏ដោយ ការកើនឡើងនេះត្រូវបានទូទាត់ដោយការធ្លាក់ចុះ ១% នៃតម្លៃអាហារ ភេសជ្ជៈ និងថ្នាំជក់។
ជាមួយតួលេខចុងក្រោយនេះបានឆ្លុះបញ្ចាំងពីប្រសិទ្ធភាពនៃគោលនយោបាយរូបិយវត្ថុតឹងតែងរបស់ធនាគារឥណ្ឌូនេស៊ី។ ក្នុងនោះអ្នកបង្កើតគោលនយោបាយនិយាយថា នេះគឺជាការចាំបាច់ដើម្បីរក្សាការរំពឹងទុកនៃអតិផរណា ដែលបានកើនឡើងនាពេលថ្មីៗនេះ។ធនាគារកណ្តាលនៃប្រទេសឥណ្ឌូនេស៊ីបានព្យាករណ៍ថាអតិផរណានឹងឈានដល់កម្រិតកំពូល ៦,៣% នៅចុងឆ្នាំនេះ។ អតិផរណាស្នូលក៏នឹងកើនឡើងដល់ ៤,៣% ហើយបន្ទាប់មកត្រឡប់ទៅកាន់គោលដៅ ២-៤% នៅឆមាសទីមួយនៃឆ្នាំក្រោយ៕