ក្រុមហ៊ុន Tesla បានលក់ ៧៥% នៃចំនួន Bitcoin ដែលខ្លួនមានក្នុងតម្លៃ ៩៣៦លានដុល្លារ។ ការធ្លាក់ចុះនៃតម្លៃ Bitcoin បានប៉ះពាល់ដល់ប្រាក់ចំណេញរបស់ក្រុមហ៊ុន Tesla ដែលបណ្តាលឱ្យក្រុមហ៊ុនរថយន្តអគ្គិសនីលក់បានតិចជាងមុន។ នាយកប្រតិបត្តិក្រុមហ៊ុន Tesla លោក Elon Musk បាននិយាយថា ពួកគេលក់ Bitcoin ដើម្បីបង្កើនសាច់ប្រាក់ ដោយសារតែបរិយាកាសអាជីវកម្មមិនច្បាស់លាស់នាពេលបច្ចុប្បន្ន ដោយសារ Covid-19។ នៅក្នុងរបាយការណ៍ប្រាក់ចំណូលត្រីមាសទីពីរដែលទើបតែប្រកាសរបស់ខ្លួន ក្រុមហ៊ុន Tesla បានកត់ត្រាសាច់ប្រាក់បន្ថែមចំនួន ៩៣៦លានដុល្លារចូលទៅកាន់តារាងតុល្យការពីប្រតិបត្តិការនេះ។
នៅក្នុងរបាយការណ៍ដែលបានដាក់ជូនគណៈកម្មការមូលបត្រអាមេរិកកាលពីដើមឆ្នាំនេះ ក្រុមហ៊ុន Tesla បាននិយាយថា ខ្លួនមានភាគហ៊ុន Bitcoin ជិត ២ពាន់លានដុល្លារនៅចុងឆ្នាំ ២០២១។ ក្រុមហ៊ុនបានចំណាយ ១,៥ ពាន់លានដុល្លារទិញ Bitcoin ក្នុងខែកុម្ភៈ ឆ្នាំ ២០២១ ហើយលក់វា ១០% បន្ទាប់ពីបាន ២ខែ។ បច្ចុប្បន្ន Tesla និយាយថាខ្លួនមានត្រឹមតែទឹកប្រាក់ប្រមាណ ២១៨ លានដុល្លារប៉ុណ្ណោះនៃ Bitcoin ។
នៅក្នុងត្រីមាសទី ២ ក្រុមហ៊ុន Tesla បានប្រកាសប្រាក់ចំណូលសរុបចំនួន ១៦,៩ ពាន់លានដុល្លារ ដែលទាបជាងចំនួន ១៧,១ ពាន់លានដុល្លារដែលបានព្យាករណ៍ពីមុនដោយក្រុមហ៊ុន Refinitiv ។ ក្នុងនោះចំណូលពីរថយន្តមានចំនួន ១៤,៦ ពាន់លានដុល្លារ, ថាមពលបានរួមចំណែក ៨៦៦ លានដុល្លារ, សេវាកម្ម និងផ្នែកផ្សេងទៀតបានរួមចំណែក ១,៤៧ ពាន់លានដុល្លារ។
ប្រាក់ចំណេញសរុបរបស់ក្រុមហ៊ុន Tesla បានឈានដល់ ២៧,៩% ទាបជាង ៣២,៩% នៅក្នុងត្រីមាសទីមួយ និង ២៨,៤% ក្នុងរយៈពេលដូចគ្នាកាលពីឆ្នាំមុន ដោយសារឥទ្ធិពលនៃអតិផរណា និងការប្រកួតប្រជែងនៅក្នុងទីផ្សារសម្រាប់អាគុយ និងសមាសធាតុផ្សេងទៀត។
កាលពីឆ្នាំមុន Elon Musk បានបង្ហាញចំណាប់អារម្មណ៍ម្តងហើយម្តងទៀតចំពោះ Bitcoin និង Dogecoin ។ Tesla ក៏ធ្លាប់អនុញ្ញាតឱ្យអតិថិជនទិញរថយន្តអគ្គិសនីរបស់ក្រុមហ៊ុនជាមួយ Bitcoin ។ ទោះជាយ៉ាងណាក៏ដោយក្រោយមកពួកគេបានប្រកាសថាពួកគេឈប់ទទួលយកវាដោយលើកឡើងពីការព្រួយបារម្ភអំពីបរិស្ថានពីការជីកយករ៉ែ Bitcoin ៕