[បរទេស] តាមការចុះផ្សាយ ក្រុមហ៊ុន Peloton នឹងឈប់ផលិតកង់ និងម៉ាស៊ីនហាត់ប្រាណដោយខ្លួនឯង ដែលជាការផ្លាស់ប្តូរ សម្រាប់ក្រុមហ៊ុនដែលកំពុងជួបការលំបាកក្នុងគោលបំណងកាត់បន្ថយការចំណាយ និងធានានូវសមត្ថភាពរបស់ខ្លួនក្នុងការបន្តដំណើរទៅមុខទៀត។
ដោយហៅការផ្លាស់ប្តូរនេះថាជា “វឌ្ឍនភាពធម្មជាតិ” នៅក្នុងសេចក្តីថ្លែងការណ៍មួយកាលពីថ្ងៃអង្គារ លោក Peloton បាននិយាយថា ក្រុមហ៊ុនផលិតតៃវ៉ាន់ Rexon Industrial Corp. នឹងក្លាយជាក្រុមហ៊ុនផលិតឧបករណ៍ហាត់ប្រាណដ៏សំខាន់របស់ខ្លួននាពេលអនាគត។ ជាលទ្ធផល Peloton នឹងបិទរោងចក្ររបស់ខ្លួនដែលដំណើរការដោយ Tonic Fitness Technology ដែលជាក្រុមហ៊ុនដែលខ្លួនបានទិញក្នុងឆ្នាំ ២០១៩។
ក្នុងនោះ ក្រុមហ៊ុន Peloton ក៏បាននិយាយផងដែរថា ខ្លួននឹងផ្អាកការផលិតនៅ Tonic “រហូតដល់ដាច់ឆ្នាំ ២០២២” ដែលជាសញ្ញាបង្ហាញពីការធ្លាក់ចុះយ៉ាងខ្លាំងនៃការបញ្ជាទិញ។ ក្រុមហ៊ុនបាននិងកំពុងបន្ថយល្បឿនផលិតកម្មអស់ជាច្រើនខែ ដោយសារប្រជាប្រិយភាពនៃផលិតផលរបស់ខ្លួនធ្លាក់ចុះ។ ទើបតែមួយឆ្នាំមុន Peloton (PTON) បានប្រកាសថាខ្លួនកំពុងសាងសង់រោងចក្រផ្ទាល់ខ្លួន តម្លៃ ៤០០លានដុល្លារនៅរដ្ឋ Ohio ដើម្បីបំពេញតម្រូវការ ហើយផែនការទាំងនោះត្រូវបានលុបចោលតាំងពីពេលនោះមក។
យោងតាមសារព័ត៌មាន Bloomberg បានឱ្យដឹងថា បុគ្គលិកប្រហែល ៦០០នាក់នៅ Tonic នឹងត្រូវបញ្ឈប់ពីការងារ៕