ឆ្នាំ២០២០ នេះ គឺជាឆ្នាំដ៏ពិសេសមួយសម្រាប់ CEO ក្រុមហ៊ុន Tesla និង SpaceX ដោយលោក Elon Musk បានឈានដល់ចំណុចកំពូលថ្មីមួយ កាលពីថ្ងៃច័ន្ទ ដោយទាញទម្លាក់មហាសេដ្ឋី Bill Gates ក្លាយជាអ្នកមានបំផុតទី២ នៅលើពិភពលោក។
ទ្រព្យសម្បត្តិសុទ្ធរបស់សហគ្រិនវ័យ ៤៩ ឆ្នាំរូបនេះ បានកើនឡើង ៧,២ ពាន់លានដុល្លារ សរុបទាំងអស់គឺ ១២៧,៩ ពាន់លានដុល្លារ ដោយសារតែការឡើងថ្លៃភាគហ៊ុនរបស់ក្រុមហ៊ុន Tesla។
លោក Musk បានបន្ថែមលុយចំនួន ១០០,៣ ពាន់លានដុល្លារ ចូលក្នុងទ្រព្យសម្បត្តិសុទ្ធរបស់លោក នៅឆ្នាំ២០២០នេះ ដែលច្រើនជាងអ្នកណាទាំងអស់។ នេះបើយោងតាម Bloomberg Billionaires Index។
គួររំលឹកឲ្យដឹងថា កាលពីខែមករា ដើមឆ្នាំ២០២០ កន្លងទៅនេះ លោក Musk បានជាប់ឈ្មោះជាអ្នកមានបំផុតទី៣៥ ប៉ុណ្ណោះ។
យ៉ាងណាមិញ ការកើនឡើងនៃទ្រព្យសម្បត្តិរបស់លោក ភាគច្រើនដោយសារក្រុមហ៊ុន Tesla ដែលបច្ចុប្បន្នមានតម្លៃទីផ្សារជិតដល់ ៥០០ ពាន់លានដុល្លារ៕