លោក Bill Gates ត្រូវបានគេស្គាល់យ៉ាងច្បាស់ថាជាស្ថាបនិកក្រុមហ៊ុន Microsoft ជាមហាសេដ្ឋីប្រចាំសហរដ្ឋអាមេរិក ក៏ដូចជាបុគ្គលដ៏មានឥទ្ធិពលមួយរូប។ ភាពជោគជ័យនេះ គឺមិនអាចផ្ដាច់ចេញពីទម្លាប់រស់នៅប្រចាំថ្ងៃលោកនោះទេ។ ខាងក្រោមនេះ គឺជាទម្លាប់របស់លោក Bill Gates ដែលយើងអាចរៀនសូត្រ និងអនុវត្តតាម៖
១) ទម្លាប់អាន និងរៀនសូត្រឥតឈប់ឈរ
ការអានសៀវភៅគឺជាទម្លាប់មួយដែលខ្វះមិនបានសម្រាប់លោក Bill Gates ដោយលោកតែងតែចែករំលែក សៀវភៅល្អៗជាច្រើននៅលើប្លុកផ្លូវការរបស់គាត់។ នៅក្នុងមួយឆ្នាំលោកអានសៀវភៅជាមធ្យម ៥០ក្បាល មានជាប្រភេទវិទ្យាសាស្រ្ត អាជីវកម្ម និងបញ្ហាសង្គមជាដើម។ ការអានច្រើន អាចជួយបង្កើនចំណេះដឹង និងធ្វើឲ្យគំនិតលោកកាន់តែមុតស្រួច។
២) គេងឲ្យបានគ្រប់គ្រាន់
លោក Bill Gates បានបញ្ជាក់ថា ការគេងឱ្យបានគ្រប់គ្រាន់ គឺជារឿងសំខាន់សម្រាប់រក្សាផលិតភាព និងភាពច្បាស់លាស់នៃគំនិត។ លោកព្យាយាមគេងឲ្យបាន ៧ម៉ោង ជារៀងរាល់យប់ ដោយជឿថាបើគេងមិនគ្រប់គ្រាន់គឺអាចប៉ះពាល់យ៉ាងធ្ងន់ធ្ងរដល់សមត្ថភាពច្នៃប្រឌិត ផលិតភាព និងឆាប់ភ្លេចភ្លាំង។ល។
៣) ការកំណត់គោលដៅ និងពេលវេលាច្បាស់លាស់
លោក Bill Gates មានចក្ខុវិស័យ និងផែនការច្បាស់លាស់សម្រាប់ជំនួញលោក។ លោកមិនធ្វើការងារដោយគ្មានផែនការនោះទេ។ លោកផ្តោតលើ “រូបភាពធំ” ថាតើជំហានតូចៗដែលលោកកំពុងធ្វើនាពេលបច្ចុប្បន្ននឹងនាំលោកទៅដល់គោលដៅដ៏ធំនៅថ្ងៃអនាគតដោយរបៀបណា។
៤) ការគ្រប់គ្រងពេលវេលា
Time Blocking គឺជាវិធីសាស្រ្តដែលលោកប្រើប្រាស់កំណត់ពេលវេលា និងសកម្មភាពនីមួយៗ ដោយមិនអនុញ្ញាតឲ្យមានការរំខានពីអ៊ីមែល ឬបណ្តាញសង្គម អំឡុងពេលលោកបំពេញការងារនោះទេ។ ដោយលោកបែងចែកពេលវេលាការងារ និងពេលវេលាផ្ទាល់ខ្លួនយ៉ាងច្បាស់លាស់។
៥) រៀនសូត្រពីកំហុសឆ្គង
លោក Bill Gates មិនខ្លាចក្នុងការទទួលកំហុសរបស់ខ្លួន និងចាត់ទុកកំហុសទាំងនោះ ជាមេរៀនដ៏មានតម្លៃ។ លោកតែងតែវិភាគកំហុសទាំងនោះ ដើម្បីកែប្រែផែនការ យុទ្ធសាស្រ្តដែលនាំលោកឆ្ពោះទៅរកភាពប្រសើរឡើង។
៦) ចូលរួមការងារមនុស្សធម៌ ផ្តល់ត្រឡប់ឲ្យសង្គមវិញ
លោក Bill Gates ជឿជាក់ថាសុភមង្គលពិតប្រាកដ គឺស្ថិតនៅត្រង់ការប្រើប្រាស់ធនធានដើម្បីដោះស្រាយបញ្ហាធំៗរបស់ពិភពលោក និងលើកកម្ពស់ជីវភាពមនុស្សជាតិ។ Bill & Melinda Gates Foundation គឺជាមូលនិធិ ដែលលោកបានលះបង់ពេលវេលា និងទ្រព្យសម្បត្តិដ៏ច្រើនសន្ធឹកសន្ធាប់ ក្នុងការផ្តល់ជាជំនួយសម្រាប់ភាពល្អប្រសើរនៃសង្គម។