ក្រុមហ៊ុន Apple បានក្លាយជាក្រុមហ៊ុនធំចុងក្រោយគេបំផុត ក្នុងការបញ្ឈប់ការលក់ផលិតផលទាំងអស់នៅក្នុងប្រទេសរុស្ស៊ី ដែលជាការដាក់ទណ្ឌកម្មមួយចំពោះការលុកលុយរបស់រុស្ស៊ីលើប្រទេសអ៊ុយក្រែន។
ក្រុមហ៊ុន Apple បាននិយាយថា ខ្លួនមានការព្រួយបារម្ភយ៉ាងខ្លាំង ចំពោះការលុកលុយរបស់រុស្ស៊ី ហើយឈរជាមួយនឹងអ្នករងគ្រោះដោយសារតែអំពើហឹង្សា។
ជាមួយគ្នានេះដែរ Apple Pay និងសេវាកម្មផ្សេងទៀត ដូចជា Apple Maps ក៏ត្រូវបានដាក់ដែនកំណត់ផងដែរ។ គួរឲ្យដឹងថា ក្រុមហ៊ុន Google ក៏បានដកអ្នកផ្សព្វផ្សាយរបស់រដ្ឋរុស្ស៊ី ដូចជា RT ចេញពីទំព័រមុខរបស់វាផងដែរ។
មិនតែប៉ុណ្ណោះ កម្មវិធីធនាគារចល័តជាភាសារុស្សី ដូចជា កម្មវិធីរបស់ធនាគារ VTB Bank ប្រហែលជាមិនដំណើរការពេញលេញនៅលើឧបករណ៍ដែលប្រើប្រាស់ប្រព័ន្ធប្រតិបត្តិការ iOS របស់ Apple ឡើយ។
ក្រុមហ៊ុន Apple បាននិយាយនៅក្នុងសេចក្តីថ្លែងការណ៍មួយថា ក្រុមហ៊ុនបានបិទទាំងមុខងារ គ្រោះថ្នាក់ចរាចរណ៍ និងហេតុការណ៍ផ្ទាល់ នៅក្នុង Apple Maps ក្នុងប្រទេសអ៊ុយក្រែន ដើម្បីជាវិធានការសុវត្ថិភាព និងប្រុងប្រយ័ត្នសម្រាប់ពលរដ្ឋអ៊ុយក្រែន៕