ក្រុមហ៊ុនលក់គ្រឿងអេឡិចត្រូនិចរបស់វៀតណាម Mobile World ត្រៀមចូលប្រឡូកក្នុងទីផ្សារប្រទេសឥណ្ឌូណេស៊ី ដែលជាទីផ្សារក្រៅប្រទេសទី២ របស់ខ្លួន បន្ទាប់ពីបានបង្កើតហាងនៅកម្ពុជា កាលពី ៥ឆ្នាំមុន។
នាយកប្រតិបត្តិក្រុមហ៊ុន Mobile World លោក Doan Van Hieu Em បានប្រាប់ម្ចាស់ភាគហ៊ុនកាលពីចុងសប្តាហ៍មុនថា “យើងកំពុងព្យាយាមឲ្យអស់ពីសមត្ថភាព ដើម្បីបើកហាងនៅឥណ្ឌូនេស៊ីដំបូងរបស់យើង នៅឆ្នាំនេះ” ។
គួររំលឹកឲ្យដឹងដែរថា ក្រុមហ៊ុនលក់គ្រឿងអេឡិចត្រូនិកដ៏ធំបំផុតរបស់វៀតណាមខាងលើ បានបើកហាងលក់ស្មាតហ្វូន BigPhone នៅក្នុងទីក្រុងភ្នំពេញរបស់ប្រទេសកម្ពុជា ក្នុងឆ្នាំ ២០១៧ ។ ៣ឆ្នាំក្រោយមក វាបានប្តូរឈ្មោះទៅជា Bluetronics និងពង្រីកការលក់ផលិតផលអេឡិចត្រូនិចផ្សេងទៀតផងដែរ។
គិតត្រឹមចុងឆ្នាំមុន វាមានហាងចំនួន ៥០ កន្លែងនៅក្នុងប្រទេសជិតខាង ហើយមានប្រាក់ចំណូលជិត ៥០០ ពាន់លានដុង (២១,៩លានដុល្លារ) ឬ ០,៤ភាគរយនៃការលក់សរុប។
ក្រុមហ៊ុននេះធ្លាប់សម្លឹងមើលប្រទេសឡាវ និងមីយ៉ាន់ម៉ា ប៉ុន្តែពេលនេះមិនច្បាស់ថាតើពួកគេនៅតែស្ថិតក្នុងផែនការរបស់ខ្លួន ឬយ៉ាងណាឡើយ។ Mobile World កំពុងកំណត់ទិសដៅកំណើនប្រាក់ចំណេញក្រោយការបង់ពន្ធ ៣០ ភាគរយនៅឆ្នាំនេះ ដល់ ៦,៣៥ទ្រីលានដុង៕