ខណៈពេលដែលសួនកម្សាន្ត Disney ភាគច្រើនត្រូវបានបើកអំឡុងត្រីមាសទី ៤ ការបន្តបិទ Disneyland នៅសហរដ្ឋអាមេរិក បានបណ្តាលឲ្យមានបញ្ហាហិរញ្ញវត្ថុយ៉ាងខ្លាំង។
ក្រុមហ៊ុនរំពឹងថា សួននៅកាលីហ្វ័រញ៉ារបស់ខ្លួន នឹងនៅតែបិទរហូតដល់ចុងឆ្នាំនេះ។ រដ្ឋមួយនេះបាននិយាយថា ខ្លួននឹងមិនអនុញ្ញាតិឲ្យសួនឧទ្យានបើកដំណើរការឡើងវិញទេ រហូតទាល់តែធូរស្បើយករណីឆ្លងវីរុសនៅក្នុងសហគមន៍ជុំវិញនោះ។ បច្ចុប្បន្ននេះករណីកូវីដ១៩ កំពុងតែកើនឡើងនៅឡើយ។
នាយកប្រតិបត្តិ Disneyland លោក Bob Chapek មានប្រសាសន៍ថា “ជាអកុសល យើងមានការខកចិត្តយ៉ាងខ្លាំងដែលរដ្ឋកាលីហ្វ័រនីញ៉ា នៅតែបន្តបិទទ្វារ Disneyland ទោះបីជាយើងមានកំណត់ត្រាល្អក៏ដោយ។ វិធីការពារសុខភាព និងសុវត្ថិភាពរបស់យើង គឺផ្អែកលើវិទ្យាសាស្ត្រ និងមានការគាំទ្រពីសហជីព ដែលតំណាងឲ្យ ៩៩% នៃសមាជិកដែលបានចូលរួមក្នុងម៉ោងធ្វើការរបស់យើង”។
កាលពីថ្ងៃព្រហស្បតិ៍កន្លងទៅ ក្រុមហ៊ុន Disney បាននិយាយថា ការផ្ទុះឡើងនៃជំងឺកូវីដ១៩ បានធ្វើឲ្យសួន និងផ្នែកផលិតផល ខាតបង់ប្រហែល ២,៤ ពាន់លានដុល្លារ ក្នុងកំឡុងពេលថ្មីៗនេះ។ ផ្នែកនេះមានរួមបញ្ចូលទាំងសួនឧទ្យាន ផ្លូវនាវា រមណីយដ្ឋាន និងកន្លែងលក់ទំនិញផងដែរ៕