យោងតាមសារព័ត៌មានបាងកកប៉ុស្តិ៍របស់ប្រទេសថៃ បានចេញផ្សាយថា អាកាសយានដ្ឋានអន្តរជាតិតារាសាគរ (Dara Sakor International Airport) ក្នុងខេត្តកោះកុង គ្រោងនឹងបើកការសាកល្បងហោះហើរ នៅដើមឆ្នាំក្រោយ ខណៈដែលដំណើរការសាងសង់ទាំងមូលជិតរួចរាល់ហើយ។
ការសាកល្បងនេះនឹងនាំឱ្យមានសេវាហោះហើរពាណិជ្ជកម្ម ចាប់ផ្តើម និងរួមចំណែក ដល់ការធ្វើដំណើររបស់អ្នកដំណើរ តាមផ្លូវអាកាស។
ដំណឹងខាងលើនេះត្រូវបានឲ្យដឹងដោយតំណាងក្រុមហ៊ុន Dara Sakor International Airport Construction ដែលជាក្រុមហ៊ុនដែលបានវិនិយោគលើអាកាសយានដ្ឋាន ក្នុងជំនួបជាមួយ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ កាលពីថ្ងៃសៅរ៍។ នេះបើយោងតាមសារព័ត៌មានថៃខាងលើ។
គួរឲ្យដឹងថា ការសាងសង់ទាំងមូលគឺសម្រេចបានប្រហែល ៩៥% ហើយក្រុមហ៊ុនបាននិយាយថា ការងារទាក់ទងនឹងការសាងសង់ស្ថានីយចេញចូល (Terminal Building) កំពុងដំណើរការ ហើយក្រុមហ៊ុននឹងពន្លឿនការងារដើម្បីបញ្ចប់នៅចុងឆ្នាំនេះតែម្តង៕
ប្រភព ៖ bangkokpost