និយតករអាមេរិកកាលពីថ្ងៃអង្គារកន្លងទៅនេះ បានបញ្ចប់ការអនុញ្ញាតឱ្យក្រុមហ៊ុនបុត្រសម្ព័ន្ធអាមេរិករបស់ China Telecom ធ្វើអាជីវកម្មនៅសហរដ្ឋអាមេរិក ដោយលើកឡើងពី “ហានិភ័យសន្តិសុខជាតិ”។
ការបោះឆ្នោតរបស់គណៈកម្មការទំនាក់ទំនងសហព័ន្ធអាមេរិក (FCC) បានបញ្ជាឱ្យក្រុមហ៊ុន China Telecom Americas ដែលគ្រប់គ្រងដោយទីក្រុងប៉េកាំង បញ្ឈប់សេវាកម្មក្នុងរយៈពេល ៦០ ថ្ងៃ ដោយបញ្ចប់ប្រតិបត្តិការជិត ២០ ឆ្នាំរបស់ខ្លួននៅក្នុងសហរដ្ឋអាមេរិក និងធ្វើឱ្យមានភាពតានតឹងរវាងប្រទេសមហាអំណាចសេដ្ឋកិច្ចទាំងពីរផងដែរ។
បើយោងតាមសេចក្តីថ្លែងការណ៍មួយរបស់ FCC បានឲ្យដឹងថា “ភាពជាម្ចាស់ និងការគ្រប់គ្រងក្រុមហ៊ុនដោយរដ្ឋាភិបាលចិន បង្កើនហានិភ័យសន្តិសុខជាតិ និងការអនុវត្តច្បាប់ ដោយផ្តល់ឱកាសសម្រាប់ទីក្រុងប៉េកាំង ដើម្បីចូលប្រើ រក្សាទុក រំខាន និង/ឬធ្វើឱ្យទំនាក់ទំនងរបស់សហរដ្ឋអាមេរិកមិនត្រឹមត្រូវ ដែលនាំឱ្យពួកគេចូលរួមក្នុងចារកម្ម និងសកម្មភាពគ្រោះថ្នាក់ផ្សេងៗទៀត។
FCC បានបន្ថែមឲ្យដឹងថា “ការលើកកម្ពស់សន្តិសុខជាតិ គឺជាផ្នែកសំខាន់មួយនៃការទទួលខុសត្រូវរបស់គណៈកម្មការដើម្បីជំរុញផលប្រយោជន៍សាធារណៈ ហើយសកម្មភាពថ្ងៃនេះ គឺដើម្បីការពារហេដ្ឋារចនាសម្ព័ន្ធទូរគមនាគមន៍របស់សហរដ្ឋអាមេរិក”។
គួរឲ្យដឹងថា China Telecom គឺជាប្រតិបត្តិករបណ្តាញទូរសព្ទចល័តដ៏ធំបំផុតរបស់ប្រទេសចិន ហើយភាគហ៊ុនរបស់វាបានកើនឡើងប្រហែល ២០ ភាគរយនៅក្នុងខែសីហា នៅក្នុងការចាប់ផ្តើមភាគហ៊ុនដំបូងនៅទីក្រុងសៀងហៃ៕