ទូរសព្ទ iPhone 13 រាប់ម៉ឺនគ្រឿងត្រូវបានលក់ដាច់នៅក្នុងប្រទេសវៀតណាម ក្នុងរយៈពេលប៉ុន្មានថ្ងៃនៃការចេញលក់របស់វា ជាមួយនឹងចំនួនដែលលើសពីការផ្តល់ជូនពីមុនរបស់ក្រុមហ៊ុន Apple។
ក្នុងនោះ ហាងលក់ទូរសព្ទមួយកន្លែងមានឈ្មោះថា FPT Shop បានលក់ទូរសព្ទជិត ៥ ០០០ គ្រឿង ក្នុងតម្លៃ ៨,៧៩លានដុល្លារ នៅថ្ងៃដំបូងនៃការចេញលក់ ពោលគឺនៅថ្ងៃទី២២ ខែតុលា ដោយបំបែកកំណត់ត្រា iPhone មុនៗ។ នេះបើតាមសម្តី លោក Nguyen The Kha ដែលជាអ្នកគ្រប់គ្រងនៅហាងខាងលើ។
គួរឲ្យដឹងថា កាលពីឆ្នាំមុន ហាងខាងលើបានលក់ដាច់ iPhone 12 សរុបចំនួន ៤ ៥០០គ្រឿង នៅថ្ងៃដំបូង។
មិនតែប៉ុណ្ណោះ ហាងផ្សេងទៀតដូចជា CellphoneS បានលក់ដាច់ iPhone 13 ជិត ៣ ០០០គ្រឿងនៅថ្ងៃដំបូង បើប្រៀបធៀបនឹងឆ្នាំមុនត្រឹម ១ ០០០គ្រឿង។
ដោយឡែក ហាង Minh Tuan Mobile ដែលទើបតែចាប់ផ្តើមលក់ផលិតផល Apple ជាលើកដំបូងនៅក្នុងឆ្នាំនេះ បានលក់ដាច់ iPhone សរុប ១ ០០០គ្រឿងក្នុងរយៈពេលត្រឹម ២ថ្ងៃ៕