យោងតាមលោក Tim Sweeney នាយកប្រតិបត្តិក្រុមហ៊ុន Epic Games បានឲ្យដឹងថា ក្រុមហ៊ុន Apple បានហាមឃាត់ Fortnite ពី App Store របស់ខ្លួន រហូតដល់ការប្រយុទ្ធគ្នាស្របច្បាប់ជាមួយក្រុមហ៊ុនផលិតហ្គេម Epic បានបញ្ចប់។
វាមានន័យថា ហ្គេមដ៏ពេញនិយមមួយនេះ នឹងមិនមានសម្រាប់អ្នកប្រើប្រាស់ថ្មីដើម្បីទាញយកនៅលើ iPhones ឬឧបករណ៍ Apple ផ្សេងទៀតនោះទេ។
លោក Sweeney បានហៅក្រុមហ៊ុន Apple នៅក្នុងបណ្តាញសង្គម Twitter របស់ខ្លួន និងនិយាយថា ដំណើរការបណ្តឹងឧទ្ធរណ៍អាចចំណាយពេលប្រហែល ៥ ឆ្នាំដើម្បីបញ្ចប់។ ទោះជាយ៉ាងណាក៏ដោយ អ្នកដែលបានទាញយកហ្គេមរួចហើយនៅលើឧបករណ៍ Apple របស់ពួកគេ នឹងអាចបន្តលេងបាន ប៉ុន្តែនឹងមិនទទួលបានការអាប់ដេតថ្មីនោះទេ។
គួរឲ្យដឹងថា Fortnite ត្រូវបានដកចេញពី App Store របស់ Apple កាលពីឆ្នាំមុន ដោយសារតែរំលោភគោលការណ៍របស់ខ្លួនដោយបើកដំណើរការប្រព័ន្ធទូទាត់ប្រាក់ក្នុងកម្មវិធីផ្ទាល់ខ្លួន (in-app payment system)។
សូមបញ្ជាក់ថា Apple បានគិតកម្រៃជើងសា ៣០ ភាគរយលើរាល់ការទិញក្នុងកម្មវិធី (in-app purchases) លើ App Store ប៉ុន្តែកម្មវិធី in-app payment system ផ្ទាល់ខ្លួនរបស់ Fortnite ព្យាយាមគេចពីការគិតកម្រៃជើងសានេះ៕