យោងតាមប្រភពព័ត៌មានបានឲ្យដឹងថា វៀតណាម បានវ៉ាដាច់ប្រទេសថៃនៅឆមាសទីមួយនៃឆ្នាំ ២០២១ នេះ ហើយក្លាយជាអ្នកនាំចេញត្រីធូណាធំជាងគេទៅកាន់អ៊ីស្រាអែល។
ប្រទេសវៀតណាម មានចំនួន ៣១ ភាគរយនៃការនាំចូលត្រីធូណារបស់អ៊ីស្រាអែល ខណៈប្រទេសនោះក្លាយជាទីផ្សារធំបំផុតទី ៣ របស់វៀតណាម បន្ទាប់ពីសហរដ្ឋអាមេរិក និងអ៊ីតាលី។
បើយោងតាមសមាគមអ្នកនាំចេញ និងផលិតគ្រឿងសមុទ្រវៀតណាម (VASEP) បាននិយាយថា អ៊ីស្រាអែល បានទិញត្រីធូណាតិចជាងមុនពីប្រទេសភាគច្រើន ចំពេលមានការរីករាលដាលនៃជំងឺកូវីដ១៩ ប៉ុន្តែបានបង្កើនការនាំចូលពីប្រទេសវៀតណាមវិញ។
ទិន្នន័យចុងក្រោយពី VASEP បង្ហាញថា ការនាំចេញរបស់វៀតណាមទៅកាន់អ៊ីស្រាអែល បានកើនឡើង ៣៤ ភាគរយក្នុងឆ្នាំ ២០២១ នេះ រហូតដល់ជិត ២៥ លានដុល្លារ។
យ៉ាងណាមិញ VASEP បានត្អូញត្អែរទៅកាន់រដ្ឋាភិបាលម្តងហើយម្តងទៀត ឲ្យចាក់ថ្នាំបង្ការដល់កម្មករក្នុងវិស័យជលផលឲ្យបានកាន់តែឆាប់រហ័ស ដើម្បីធានាថាសង្វាក់ផ្គត់ផ្គង់មិនមានការរំខាន៕