កម្មវិធីជជែកកម្សាន្តតាមអនឡាញ Discord រៃអង្គាសប្រាក់បានចំនួន ៥០០ លានដុល្លារ នៅក្នុងមូលនិធិថ្មីមួយដឹកនាំដោយក្រុមហ៊ុនវិនិយោគ Dragoneer Investment Group។ នេះបើយោងតាមអ្នកនាំពាក្យរបស់ក្រុមហ៊ុន Discord បាននិយាយនៅថ្ងៃពុធ ទី១៥ ខែកញ្ញានេះ។
ទីភ្នាក់ងារព័ត៌មាន Bloomberg បានរាយការណ៍ថា ការរៃអង្គាសប្រាក់ខាងលើនេះ បានធ្វើឲ្យតម្លៃក្រុមហ៊ុនឡើងដល់ប្រមាណ ១៥ ពាន់លានដុល្លារអាមេរិក។ ទោះបីជាយ៉ាងណាក៏ដោយ Discord បានបដិសេធមិនធ្វើអត្ថាធិប្បាយអំពីការវាយតម្លៃនោះឡើយ។
អ្នកនាំពាក្យរបស់ Discord បានបន្ថែមឲ្យដឹងទៀតថា ក្រុមហ៊ុនល្បីៗជាច្រើនដូចជា Baillie Gifford & Co, Coatue Management, Fidelity Management & Research Co និង Franklin Templeton ក៏បានចូលរួមក្នុងការផ្តល់ដើមទុនខាងលើ រួមជាមួយវិនិយោគិនដែលមានស្រាប់ផងដែរ។
គួរឲ្យដឹងថា Discord ទទួលបានប្រជាប្រិយភាពយ៉ាងខ្លាំង ក្នុងអំឡុងពេលមានជំងឺរាតត្បាតកូវីដ១៩ និងត្រូវបានប្រើដំបូងដោយអ្នកលេងហ្គេម ខណៈឥឡូវនេះ វាបានពង្រីកកាន់តែធំសម្រាប់ការទំនាក់ទំនងអនឡាញ និងព្រឹត្តិការណ៍ផ្សេងៗទៀតផង៕