យោងតាមប្រភពព័ត៌មានបានឲ្យដឹងថា Samsung គ្រោងនឹងពង្រីករោងចក្ររបស់ខ្លួននៅភាគខាងជើងខេត្តបាកនិញ (Bac Ninh) នៅឆ្នាំនេះ ដើម្បីបង្កើនសមត្ថភាពផលិតស្មាតហ្វូនដែលអាចបត់អេក្រង់បាន។
ក្រុមហ៊ុននេះនឹងចាប់ផ្តើមគម្រោងពង្រីកនៅឆមាសទីពីរនៃឆ្នាំ ២០២១ នេះ ដោយកំណត់ទិសដៅប្រតិបត្តិការពេញលេញនៅចុងឆ្នាំ ២០២១ ឬនៅដើមឆ្នាំក្រោយ។ នេះបើយោងតាម The Korea Economic Daily។
ការពង្រីកនេះគឺដើម្បីបង្កើនសមត្ថភាពផលិតប្រចាំឆ្នាំរបស់ Samsung ទៅលើស្មាតហ្វូនបត់អេក្រង់ ៤៧ ភាគរយ ពីចំនួន ១៧ លានគ្រឿងបច្ចុប្បន្ន ដល់ ២៥ លានគ្រឿង។
ក្រុមអ្នកជំនាញនិយាយថា នៅពេលដែលក្រុមហ៊ុន Samsung បញ្ចប់ការពង្រីករួចរាល់ ក្រុមហ៊ុននេះនឹងអាចផលិតបាននូវម៉ូដែល Galaxy Z Fold ចំនួន ១០ លានគ្រឿង និងម៉ូដែល Z Flip ចំនួន ១៥ លានគ្រឿងក្នុងមួយឆ្នាំ។
គួរឲ្យដឹងថា ការសម្រេចចិត្តរបស់ Samsung ក្នុងការបង្កើនសមត្ថភាពផលិតនេះ ត្រូវបានជំរុញជាចម្បងដោយតម្រូវការទីផ្សារកើនឡើង។ ស្មាតហ្វូនដែលអាចបត់អេក្រង់បានជំនាន់ទី ៣ របស់វា បានកត់ត្រាការបញ្ជាទិញទុកមុន ចំនួន ៩២០ ០០០ គ្រឿងនៅកូរ៉េខាងត្បូង ពោលគឺខ្ពស់ជាងស្មាតហ្វូន Galaxy S21 ចំនួន ១,៨ ដងឯណោះ៕