ការលក់រថយន្តថ្មីនៅអាមេរិក កំពុងធ្លាក់ចុះយ៉ាងខ្លាំង ដោយសារតែការរួមបញ្ចូលគ្នានៃកង្វះមីក្រូឈីប និងបញ្ហាផ្គត់ផ្គង់ ដែលបណ្តាលមកពីការរឹតត្បិតពាក់ព័ន្ធនឹងជំងឺកូវីដ១៩។ ប៉ុន្តែអ្នកវិភាគជឿថា អ្នកឈ្មួញចែកចាយតម្លើងថ្លៃរថយន្តក៏ជាកត្តាចូលរួមក្នុងរឿងនេះដែរ។
គួរឲ្យដឹងដែរថា ក្រុមហ៊ុនផលិតរថយន្តជាច្រើន កំពុងតែជួបបញ្ហា ក្នុងនោះរួមមានទាំង Ford និង GM ក៏ដូចជា Toyota, Honda, Hyundai, Subaru និង Kia ក៏ធ្លាក់ក្នុងវិបត្តិដូចគ្នាដែរ ហើយលទ្ធផលគឺការធ្លាក់ចុះ ១៧ ភាគរយនៃការលក់រថយន្តធុនស្រាលនៅសហរដ្ឋអាមេរិក កាលពីខែមុន។
គេហទំព័ររថយន្ត Automotive News រាយការណ៍ថា ការធ្លាក់ចុះនេះគឺប្រហាក់ប្រហែលទៅនឹងការព្យាករណ៍ ពី ៤ ទៅ ១៨ ភាគរយ ដោយអ្នកវិភាគ Cox Automotive, TrueCar, JD Power និង LMC Automotive ។
មិនតែប៉ុណ្ណោះ ការលក់រថយន្តរបស់ក្រុមហ៊ុន Ford បានធ្លាក់ចុះ ៣៣ ភាគរយ ប៉ុន្តែ Subaru ក៏ជួបបញ្ហាផងដែរ ដោយការលក់ធ្លាក់ចុះ ១៥ ភាគរយ។ ក្រុមហ៊ុន Honda បានធ្លាក់ចុះ ១៦ ភាគរយ បើទោះបីជា Acura ដែលជាផ្នែកមួយរបស់ខ្លួន បានមើលឃើញការលក់កើនឡើងជាង ៤ ភាគរយក៏ដោយ។ ក្រុមហ៊ុន Kia និង Hyundai ក៏បានកត់ត្រាការលក់តិចជាងមុនដែរ នៅក្នុងខែសីហា៕