ទិន្នន័យផ្លូវការមួយបានបង្ហាញនៅថ្ងៃសុក្រទី ២៧ ខែសីហានេះថា តម្លៃផ្ទះឯកជននៅទីក្រុងហុងកុង បានកើនឡើង ០,៤៦ ភាគរយនៅក្នុងខែកក្កដា ដែលជិតដល់កម្រិតខ្ពស់បំផុត ដោយសារតែតម្រូវការដ៏ខ្ពស់។
តម្លៃផ្ទះឯកជននៅក្នុងទីក្រុងហុងកុង ដែលស្ថិតក្នុងទីផ្សារអចលនទ្រព្យថ្លៃបំផុតមួយនេះ បានកើនឡើងរយៈពេល ៧ ខែជាប់គ្នា នេះបើយោងតាមទិន្នន័យកាលពីខែមុន និងប្រៀបធៀបជាមួយនឹងការកើនឡើង ០,១ ភាគរយ នៅក្នុងខែមិថុនា។
ទីភ្នាក់ងារអចលនទ្រព្យរំពឹងថា សន្ទស្សន៍តម្លៃដែលមានចំនួន ៣៩៦,៣ ក្នុងខែកក្កដា នឹងបំបែកឯតទគ្គកម្ម ៣៩៦,៩ ដែលបានប្រកាសនៅខែឧសភា ឆ្នាំ ២០១៩ នៅត្រីមាសទី ៣។
លោក Thomas Lam នាយកប្រតិបត្តិនៃក្រុមហ៊ុនប្រឹក្សាអចលនទ្រព្យសកល Knight Frank បានមានប្រសាសន៍ថា “ចំណូលខ្ពស់នៅក្នុងទីផ្សារ គឺវិជ្ជមានចំពោះមនោសញ្ចេតនារបស់អ្នកទិញ”។
យោងតាមសន្ទស្សន៍របស់ភ្នាក់ងារអចលនទ្រព្យ Centaline ដែលតាមដានទីផ្សារផ្ទះបន្ទាប់បន្សំ តម្លៃបានបំបែកកំណត់ត្រាខ្ពស់ជាប្រវត្តិសាស្ត្រនៅដើមខែសីហា មុនពេលធ្លាក់ចុះ ០,៥ ភាគរយនៅសប្តាហ៍បន្ទាប់។ ដោយឡែក ភ្នាក់ងារអចលនទ្រព្យផ្សេងទៀតគឺ Midland រំពឹងថា តម្លៃផ្ទះសរុបអាចកើនឡើងក្នុងល្បឿនយឺតជាងមុន រហូតដល់ព្រំដែនជាមួយចិនដីគោកបើកឡើងវិញ៕