OnlyFans ទើបតែបានប្រកាសថា ខ្លួននឹងពន្យាពេលធ្វើការផ្លាស់ប្តូរលើគោលការណ៍ ស្តីពីការហាមឃាត់មាតិកាអាសអាភាស បន្ទាប់ពីមានប្រតិកម្មយ៉ាងខ្លាំងពីអ្នកប្រើប្រាស់។
គួររំលឹកឲ្យដឹងថា កាលពីពេលថ្មីៗកន្លងទៅនេះ OnlyFans បានប្រកាសពីផែនការដើម្បីហាមឃាត់រូបថត និងវីដេអូអាសអាភាស នៅលើគេហទំព័ររបស់ខ្លួន ចាប់ពីខែតុលា។
ទោះជាយ៉ាងណាក៏ដោយ កាលពីថ្ងៃពុធកន្លងទៅនេះ វាបានបង្ហោះសារនៅលើបណ្តាញសង្គម Twitter របស់ខ្លួនវិញថា វាបានផ្អាកគម្រោងផ្លាស់ប្តូរគោលការណ៍ នៅថ្ងៃទី ១ ខែតុលា នោះហើយ និងបានបន្ថែមថា វានៅតែបន្តផ្តល់ទីកន្លែងសម្រាប់អ្នកបង្កើតមាតិកាគ្រប់ប្រភេទ។
សូមបញ្ជាក់ឲ្យដឹងថា គេហទំព័រ OnlyFans មានការរីកចម្រើនខ្លាំងក្នុងអំឡុងពេលមានជំងឺរាតត្បាតកូវីដ១៩ ហើយនិយាយថា វាមានអ្នកប្រើប្រាស់ចំនួន ១៣០ លាននាក់ឯណោះ។ ចំណែកឯការប្រកាសផ្លាស់ប្តូរគោលការណ៍នោះ គឺបានកើតឡើងបន្ទាប់ពីសារព័ត៌មាន BBC News បានទាក់ទងក្រុមហ៊ុនខាងលើ ដើម្បីឆ្លើយតបទៅនឹងការលេចធ្លាយឯកសារទាក់ទងនឹងគណនីដែលបង្ហោះមាតិកាខុសច្បាប់។ OnlyFans បាននិយាយថា ការផ្លាស់ប្តូរនេះបានកើតឡើងបន្ទាប់ពីមានសម្ពាធពីដៃគូធនាគារ៕