យោងតាមប្រភពព័ត៌មានបានឲ្យដឹងថា ក្រុមហ៊ុនអាកាសចរណ៍ធំបំផុតទី ៣ របស់អាមេរិក គឺ Delta នឹងកាត់លុយចំនួន ២០០ ដុល្លារប្រចាំខែ ដល់និយោជិកដែលមិនទាន់បានចាក់វ៉ាក់សាំងប្រឆាំងនឹងជំងឺកូវីដ១៩។
មិនតែប៉ុណ្ណោះ ក្រុមហ៊ុន Delta ក៏នឹងចំណាយលុយ (sick pay) តែលើបុគ្គលិកកើតជំងឺកូវីដ១៩ ដែលបានចាក់វ៉ាក់សាំងរួច ២ដងប៉ុណ្ណោះ។ លោក Ed Bastian ដែលជាមេក្រុមហ៊ុន Delta បាននិយាយថា វានឹងជួយទប់ស្កាត់ការរីករាលដាលនៃជំងឺកូវីដ១ ខណៈការឆ្លងកំពុងកើនឡើងនៅទូទាំងសហរដ្ឋអាមេរិក។
គួរឲ្យដឹងថា នេះគឺជាការប៉ុនប៉ងចុងក្រោយបង្អស់របស់ក្រុមហ៊ុនធំមួយ ក្នុងការធ្វើឲ្យបុគ្គលិកខ្ជិលច្រអូសរបស់ខ្លួន ទៅចាក់វ៉ាក់សាំងកូវីដ១៩។
នៅក្នុងកំណត់ហេតុមួយទៅកាន់បុគ្គលិក លោក Bastian បាននិយាយថា ការកាត់លុយនេះនឹងអនុវត្តចាប់ពីថ្ងៃទី ១ ខែវិច្ឆិកា ដល់បុគ្គលិកដែលបានចុះឈ្មោះក្នុងផែនការធានារ៉ាប់រងសុខភាពរបស់ខ្លួន មានន័យថា ភាគច្រើននៃបុគ្គលិក ៧៥ ០០០ នាក់របស់ខ្លួន នឹងត្រូវរងផលប៉ះពាល់។
លោក Bastian បានបន្ថែមទៀតថា ការស្នាក់នៅមន្ទីរពេទ្យជាមធ្យមសម្រាប់អ្នកជំងឺកូវីដ១៩ ឥឡូវនេះ ត្រូវចំណាយអស់ ៥ ម៉ឺនដុល្លារសម្រាប់ម្នាក់ ដែលវាជារឿងមិនអាចទទួលយកបានឡើយ៕