យោងតាមប្រភពព័ត៌មានបានឲ្យដឹងថា ក្រុមហ៊ុនប្តូររូបិយប័ណ្ណឌីជីថលឈានមុខគេរបស់ជប៉ុន Liquid ត្រូវបានក្រុម Hacker វាយលុកយកលុយជិត ១០០ លានដុល្លារ។
ក្រុមហ៊ុន Liquid បានប្រកាសថា កាបូបលុយរូបិយប័ណ្ណឌីជីថល (digital currency wallets) របស់ខ្លួនមួយចំនួន ត្រូវបានគេវាយលុក។ វាគឺជាការលួចដ៏ធំទីពីរនៃរូបិយប័ណ្ណឌីជីថល ដែលបានកើតឡើងក្នុងរយៈពេលប៉ុន្មានថ្ងៃថ្មីៗនេះ។ គួរឲ្យដឹងថា កាលពីសប្តាហ៍មុន វេទិកា digital token platform មួយឈ្មោះថា Poly Network ក៏ទទួលរងការលួចលុយជាង ៦០០ លានដុល្លារដែរ។
យ៉ាងណាមិញ ក្រុមហ៊ុនជប៉ុនខាងលើបាននិយាយនៅលើបណ្តាញសង្គម Twitter របស់ខ្លួនថា “យើងមានការសោកស្តាយដែលបានប្រកាសថាកាបូបលុយ #LiquidGlobal ត្រូវបានគេវាយលុក។ យើងកំពុងផ្លាស់ប្តូរទ្រព្យសម្បត្តិទៅក្នុងកាបូបលុយ cold wallet” ។
សូមបញ្ជាក់ឲ្យដឹងថា កាបូបលុយ “warm digital wallets” ឬ “hot digital wallets” ជាធម្មតាមានមូលដ្ឋានលើអ៊ីនធឺណិត ហើយរចនាឡើងដើម្បីឲ្យអ្នកប្រើប្រាស់អាចចូលប្រើរូបិយប័ណ្ណឌីជីថលរបស់ពួកគេកាន់តែងាយស្រួល ខណៈដែលកាបូប “cold wallets” គឺស្ថិតនៅក្រៅបណ្តាញ ហើយពិបាកចូល ដូច្នេះជាទូទៅវាមានសុវត្ថិភាពជាង៕