យោងតាមប្រភពព័ត៌មានបានឲ្យដឹងថា ក្រុមហ៊ុន Toyota នឹងកាត់បន្ថយការផលិតរថយន្តនៅទូទាំងពិភពលោក ចំនួន ៤០% នៅក្នុងខែកញ្ញា ដោយសារតែកង្វះមីក្រូឈីបនៅទូទាំងពិភពលោក។
ប្រភពដដែលបានឲ្យដឹងទៀតថា ក្រុមហ៊ុនផលិតរថយន្តធំបំផុតរបស់ពិភពលោកខាងលើ បានគ្រោងផលិតរថយន្តជិត ៩០០ ០០០ គ្រឿងនៅខែក្រោយ ប៉ុន្តែឥឡូវនេះបានកាត់បន្ថយមកត្រឹម ៥៤០ ០០០ គ្រឿងវិញ។
ដោយឡែកក្រុមហ៊ុន Volkswagen ដែលជាក្រុមហ៊ុនផលិតរថយន្តធំទី ២ របស់ពិភពលោក បានព្រមានថា ខ្លួនក៏អាចនឹងត្រូវបង្ខំចិត្តកាត់បន្ថយការផលិតរថយន្តបន្ថែមទៀតដែរ ដោយសារតែកង្វះមីក្រូឈីបនៅទូទាំងពិភពលោក។
គួរឲ្យដឹងថា ជំងឺរាតត្បាតកូវីដ១៩ បានបង្កើនតម្រូវការឧបករណ៍ដែលប្រើបន្ទះឈីប ដូចជា ទូរសព្ទ ទូរទស្សន៍ និងម៉ាស៊ីនហ្គេមជាដើម។
យ៉ាងណាមិញ គូប្រជែងផ្សេងទៀតរបស់ Toyota រួមទាំងក្រុមហ៊ុន General Motors, Ford, Nissan, Daimler, BMW និង Renault បានកាត់បន្ថយការផលិតរថយន្តរបស់ពួកគេរួចទៅហើយ ដោយសារតែបញ្ហាប្រឈមមុខនឹងការខ្វះខាតបន្ទះឈីប៕