សន្ទស្សន៍ផ្សារភាគហ៊ុនអាមេរិកបានធ្លាក់ចុះកាលពីថ្ងៃច័ន្ទ ចំពេលមានការលេចចេញជាថ្មី នូវករណីឆ្លងវីរុសកូវីដ១៩ ដែលបណ្តាលឲ្យអ្នកមានបំផុតទាំង ១០ របស់អាមេរិក ខាតបង់ប្រាក់រាប់ពាន់លានដុល្លារ។
សហរដ្ឋអាមេរិក កំពុងតែមើលឃើញនូវអាត្រាកើនឡើងនៃការឆ្លងជាប្រចាំថ្ងៃ រហូតលើសកំណត់ត្រាចាស់ កាលពីខែកក្កដា។ នេះបើយោងតាមទិន្នន័យរបស់សាកលវិទ្យាល័យ Johns Hopkins University។
វិនិយោគិនសង្ឃឹមថានឹងមានសញ្ញានៃការរីកចម្រើន លើកញ្ចប់ជំនួយដើម្បីសង្គ្រោះលើបញ្ហាវីរុសកូវីដ១៩ មុនពេលបោះឆ្នោត ប៉ុន្តែការពិភាក្សាអំពីដំណើរការនោះ នៅតែជាប់គាំងនៅឡើយ។ លើសពីនេះទៅទៀត មានក្រុមហ៊ុនរាប់រយ រាប់បញ្ចូលទាំងក្រុមហ៊ុនបច្ចេកវិទ្យាយក្ស ដូចជា Amazon និង Google ត្រូវបានកំណត់ឲ្យរាយការណ៍ពីប្រាក់ចំណូលប្រចាំត្រីមាសនៅសប្តាហ៍នេះ ចំពេលដែលកំពុងមានការប្រែប្រួលទីផ្សារខ្លាំងមុនពេលបោះឆ្នោត។
ក្នុងនោះ សន្ទស្សន៍ទីផ្សារ Dow Jones Industrial Average បានធ្លាក់ចុះ ៦៥០ ពិន្ទុ ឬ ២,៣% គិតត្រឹមម៉ោងបិទទីផ្សារកាលពីថ្ងៃច័ន្ទ ខណៈពេលដែល S&P 500 ធ្លាក់ចុះ ១,៩% និង Nasdaq Composite បានធ្លាក់ចុះ ១,៦%។
ការធ្លាក់ចុះនេះ បានធ្វើឲ្យអ្នកមានបំផុតទាំង ១០ របស់អាមេរិក រួមមាន លោក Jeff Bezos, Bill Gates, Mark Zuckerberg និង Elon Musk ខាតបង់ទឹកប្រាក់សរុប ១៤,៧ ពាន់លានដុល្លារឯណោះ។
គួរឲ្យដឹងថា អ្នកដែលខាតបង់ច្រើនជាងគេបង្អស់ក្នុងចំណោមនោះ គឺនាយកប្រតិបត្តិក្រុមហ៊ុន Facebook លោក Mark Zuckerberg ដោយសារតែភាគហ៊ុនរបស់ Facebook បានធ្លាក់ចុះ ២,៧% កាលពីថ្ងៃច័ន្ទ ធ្វើឲ្យខាតបង់លុយរបស់លោក Mark សរុប ២,៨ ពាន់លានដុល្លារឯណោះ៕