ក្រុមហ៊ុនទូរគមនាគមន៍យក្សចិន Huawei Technologies បានរាយការណ៍ពីការធ្លាក់ចុះប្រាក់ចំណូលដ៏ធំបំផុតមិនធ្លាប់មាននៅក្នុងឆមាសទីមួយ នៃឆ្នាំ ២០២១ បន្ទាប់ពីការដាក់ទណ្ឌកម្មរបស់អាមេរិកបានជំរុញឱ្យក្រុមហ៊ុននេះ លក់អាជីវកម្មទូរសព្ទចល័តដែលធ្លាប់មានឥទ្ធិពលរបស់ខ្លួន។
យោងតាមរបាយការណ៍ ក្រុមហ៊ុនខាងលើបាននិយាយថា ខ្លួនបានបង្កើតប្រាក់ចំណូលចំនួន ៤៩,៥៦ ពាន់លានដុល្លារ។ ការធ្លាក់ចុះធំបំផុតនេះ គឺមកពីក្រុមអាជីវកម្មអតិថិជន (consumer business group) របស់ក្រុមហ៊ុន Huawei ដែលរួមបញ្ចូលទាំងទូរសព្ទផងដែរ ដោយប្រាក់ចំណូលបានធ្លាក់ចុះ ៤៧ ភាគរយ ស្មើនឹង ១៣៥,៧ ពាន់លានយន់។
គួររំលឹកឲ្យដឹងដែរថា នៅឆ្នាំ ២០១៩ អតីតប្រធានាធិបតីអាមេរិក លោក ដូណាល់ ត្រាំ បានដាក់ក្រុមហ៊ុន Huawei នៅក្នុងបញ្ជីខ្មៅនៃការនាំចេញ ហើយបានរារាំងវាមិនឱ្យចូលប្រើបច្ចេកវិទ្យាដែលមានប្រភពដើមពីអាមេរិកនោះទេ ដែលធ្វើឲ្យប៉ះពាល់ដល់ក្រុមហ៊ុននេះយ៉ាងខ្លាំង។
ទណ្ឌកម្មនេះបានរំខានដល់អាជីវកម្មទូរសព្ទរបស់ក្រុមហ៊ុន Huawei ដោយវាបានធ្លាក់ចេញពីអ្នកលក់កំពូលទាំង ៥ នៅប្រទេសចិនជាលើកដំបូងក្នុងរយៈពេលជាង ៧ ឆ្នាំ នៅក្នុងត្រីមាសទី ២ ដោយដឹកទូរសព្ទចេញបានចំនួន ៦,៤ លានគ្រឿង។ នេះបើយោងតាមក្រុមហ៊ុនពិគ្រោះយោបល់ Canalys។ បើប្រៀបធៀបជាមួយត្រីមាសទី ២ ឆ្នាំ ២០២០ វាបាននាំចេញទូរសព្ទចំនួន ២៧,៤ លានគ្រឿង នៅក្នុងប្រទេសចិន៕