វៀតណាម នឹងសង់រោងចក្រផលិតវ៉ាក់សាំងកូវីដ១៩ នៅទីក្រុងហាណូយ

ក្រុមហ៊ុន Vingroup ដែលជាក្រុមហ៊ុនធំបំផុតរបស់វៀតណាម បានទទួលការអនុញ្ញាតឲ្យសាងសង់រោងចក្រដើម្បីផលិតវ៉ាក់សាំងកូវីដ១៩ នៅទីក្រុងហាណូយ។

ពាណិជ្ជកម្ម

រោងចក្រនោះនឹងត្រូវបានសាងសង់នៅក្នុងឧទ្យានបច្ចេកវិទ្យា Hoa Lac Hi-tech Park ដោយក្រុមហ៊ុន VinSmart Research and Manufacture Jsc ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Vingroup ហើយវានឹងស្ថិតក្នុងចំណោមគម្រោងអាទិភាព ដែលនឹងត្រូវអនុញ្ញាតឲ្យដំណើរការ ទោះបីជាមានការរឹតត្បិតដោយសារជំងឺកូវីដ១៩ ក៏ដោយ។

ប៉ុន្តែអ្នកគ្រប់គ្រងគម្រោងត្រូវដាក់គម្លាតសង្គមឲ្យបានតឹងរ៉ឹង និងការពារប្រជាជនមិនឲ្យចូល និងចេញពីតំបន់សំណង់ឡើយ ដើម្បីចៀសវាងការរីករាលដាលនៃជំងឺកូវីដ១៩។

Vingroup ត្រូវបានគេរាយការណ៍ថា កំពុងចរចាផ្ទេរបច្ចេកវិទ្យាជាមួយក្រុមហ៊ុនអាមេរិក Arcturus Therapeutic ដែលបានបង្កើតវ៉ាក់សាំង ដោយប្រើបច្ចេកវិទ្យា mRNA ដូចគ្នាទៅនឹងវ៉ាក់សាំង Pfizer និង Moderna ។

ប្រទេសវៀតណាមកំពុងខិតខំពន្លឿនការចាក់វ៉ាក់សាំងការពារជំងឺកូវីដ១៩ សម្រាប់ប្រជាជនជិត ១០០ លាននាក់របស់ខ្លួន។ ក្នុងនោះមានមនុស្សចំនួន ៥,៥ លាននាក់ បានទទួលវ៉ាក់សាំងមួយដង ខណៈដែល ៥៤៦ ៤០០ នាក់ទទួលបានវ៉ាក់សាំងពីរដង៕