យោងតាមប្រភពព័ត៌មានបានឲ្យដឹងថា ផ្សារទំនើបទាំងអស់នៅក្នុងទីក្រុងហូជីមិញ នឹងត្រូវបិទទ្វារនៅម៉ោង ៥ ល្ងាច ចាប់ផ្តើមពីថ្ងៃច័ន្ទនេះតទៅ ដើម្បីអនុវត្តតាមការផ្អាកសកម្មភាពពេលយប់នៅទីក្រុង ចំពេលមានការប្រយុទ្ធប្រឆាំងនឹងជំងឺកូវីដ១៩ ដែលកំពុងតែផ្ទុះឡើងខ្លាំង។
បណ្តាញក្រុមហ៊ុនផ្សារទំនើបលក់រាយដូចជា VinMart និង CoopMart នឹងដំណើរការចាប់ពីម៉ោង ៧ ព្រឹក ដល់ម៉ោង ៥ ល្ងាច ជំនួសឲ្យម៉ោង ១០ យប់វិញ។ ដោយឡែក ផ្សារទំនើប Big C នឹងបើកដំណើរការនៅម៉ោង ៥កន្លះព្រឹក ហើយបិទនៅម៉ោង ៥ ល្ងាច។
គួរឲ្យដឹងដែរថា ផ្សារទំនើបភាគច្រើននៅក្នុងទីក្រុង បានបន្ថែមទំនិញរបស់ខ្លួនទ្វេដង ឬបីដង នៃការផ្គត់ផ្គង់ធម្មតារបស់ពួកគេដើម្បីបំពេញតម្រូវការ។ ពួកគេក៏មានបុគ្គលិកដឹកទំនិញត្រៀមខ្លួនរួចជាស្រេចដែរ ក្នុងករណីដែលកម្មវិធីដឹកជញ្ជូនត្រូវហាមឃាត់។
មិនតែប៉ុណ្ណោះ ទីក្រុងហូជីមិញក៏បានហាមឃាត់ប្រជាជនមិនឲ្យចាកចេញពីផ្ទះរបស់ពួកគេដែរ បន្ទាប់ពីម៉ោង ៦ ល្ងាច ចាប់ពីថ្ងៃច័ន្ទនេះតទៅ លើកលែងតែមានការអាសន្ន។ វាគឺជាការខិតខំចុងក្រោយដើម្បីទប់ស្កាត់ការរីករាលដាលនៃរលកទី ៤ នៃជំងឺកូវីដ១៩ ដែលក្នុងនោះមានករណីជាង ៦២ ១០០ ត្រូវបានរកឃើញនៅក្នុងទីក្រុងហូជីមិញ ក្នុងចំណោម ៩៧ ៤០០ ករណីនៅទូទាំងប្រទេស៕