ភាគហ៊ុនរបស់ក្រុមហ៊ុនតាក់ស៊ីចិន Didi បានធ្លាក់ចុះ ២៥ ភាគរយ នៅថ្ងៃអង្គារ ទី៦ ខែកក្កដា ក្រោយនិយ័តកររបស់ប្រទេសចិនបានបញ្ជាឲ្យវាលុបចោលកម្មវិធីចេញពី App Store។
គួររំលឹកឲ្យដឹងថា កម្មវិធីសេវាកម្មតាក់ស៊ីដ៏ធំនេះ ត្រូវបានបញ្ជាឲ្យលុបចេញពីហាងទាញយកកម្មវិធី (mobile app stores) នៅក្នុងប្រទេសចិន កាលពីថ្ងៃអាទិត្យដោយរដ្ឋបាល Cyberspace Administration of China (CAC) ដែលតាមដានការស៊ើបអង្កេតជាផ្លូវការ លើការគ្រប់គ្រងទិន្នន័យរបស់អតិថិជន។
ក្រុមហ៊ុន Didi បានឲ្យដឹងថា ការហាមឃាត់កម្មវិធីនេះនឹងជះឥទ្ធិពលមិនល្អដល់ប្រាក់ចំណូលរបស់ខ្លួននៅក្នុងប្រទេសចិនទោះបីជាវានៅតែបន្តដំណើរការសម្រាប់អ្នកប្រើប្រាស់ដែលមានស្រាប់ក៏ដោយ។
ទោះជាយ៉ាងណាក៏ដោយ ក្រុមហ៊ុនខាងលើបានប្រាប់ទៅកាន់សារព័ត៌មាន Reuters កាលពីថ្ងៃច័ន្ទថា ខ្លួនមិនបានដឹងជាមុនអំពីការស៊ើបអង្កេតនេះឡើយ មុនពេលបង្ហាញខ្លួននៅលើទីផ្សារភាគហ៊ុន នៅទីក្រុងញ៉ូវយ៉កសប្តាហ៍មុន។
គួរឲ្យដឹងថា ភាគហ៊ុនរបស់ក្រុមហ៊ុន Didi ត្រូវបានដាក់លក់ក្នុងតម្លៃ ១៤ដុល្លារក្នុងមួយហ៊ុននៅ New York IPO និងរៃអង្គាសប្រាក់បានសរុប ៤,៤ពាន់លានដុល្លារ ក្លាយជាក្រុមហ៊ុនចិនធំបំផុត គិតចាប់តាំងពី Alibaba បានបង្ហាញខ្លួនក្នុងឆ្នាំ២០១៤ ជាមួយចំនួនប្រាក់រៃអង្គាសសរុប ២៥ពាន់លានដុល្លារ។ មិនតែប៉ុណ្ណោះ កាលពីថ្ងៃសុក្រសប្តាហ៍មុន ក្រុមហ៊ុន Didi ត្រូវបានគេវាយតម្លៃសរុបដល់ទៅ ៧៥ពាន់លានដុល្លារឯណោះ៕