TikTok កំពុងតែដំណើរការសារជាថ្មីម្តងទៀតហើយនៅក្នុងប្រទេសប៉ាគីស្ថាន កាលពីថ្ងៃសៅរ៍ ទី ៣ ខែកក្កដា បន្ទាប់ពីតុលាការបានដកការផ្អាកសេវាកម្មប្រព័ន្ធផ្សព្វផ្សាយសង្គមដ៏មានប្រជាប្រិយភាពនេះ ប៉ុន្តែបានបញ្ជាឲ្យដោះស្រាយនូវរាល់ពាក្យបណ្តឹងលើមាតិកានេះ។
អាជ្ញាធរទូរគមនាគមន៍ប៉ាគីស្ថាន Pakistan Telecoms Authority (PTA) បានរារាំងការចូលដំណើរការលើបណ្តាញសង្គម TikTok កាលពីថ្ងៃព្រហស្បតិ៍ ជាលើកទី៣ បន្ទាប់ពីសេចក្តីសម្រេចរបស់តុលាការខេត្ត Sindh បានបើកសវនាការលើញត្តិរបស់ពលរដ្ឋឯកជន ប្រឆាំងនឹងកម្មវិធីរបស់ចិននេះ។
គួរឲ្យដឹងថាការផ្អាកដំណើរការរបស់ TikTok ត្រូវបានរំខានដោយអ្នកគាំទ្រលើកម្មវិធីចែកចាយវីដេអូដ៏ធំនេះ នៅក្នុងប្រទេសប៉ាគីស្ថាន ដែលពួកគេភាគច្រើនប្រើវាដើម្បីលក់ទំនិញតាមអ៊ីនធឺណិត។ ប៉ុន្តែក្រុមអ្នករិះគន់នៅក្នុងប្រទេសកាន់សាសនាឥស្លាមខាងលើនិយាយថា វាជំរុញឲ្យមានមាតិកាអាសអាភាស និង LBGQT។
សូមបញ្ជាក់ដែរថា TikTok ត្រូវបានបិទពីរដងរួចមកហើយនៅប្រទេសប៉ាគីស្ថាន ដោយសារតែវីដេអូដែលមិនសមរម្យ៕