ក្រុមហ៊ុន Facebook Inc បានផ្អាកដំណើរការគណនី Facebook និង Instagram របស់អតីតប្រធានាធិបតីអាមេរិក ដូណាល់ ត្រាំ រយៈពេល ២ ឆ្នាំ។
លោក ត្រាំ ត្រូវបានគេរារាំងមិនឲ្យប្រើគេហទំព័រទាំងពីរនៅក្នុងខែមករា បន្ទាប់ពីមានការបង្ហោះ ដែលលោកបានធ្វើនៅកុបកម្ម US Capitol។ ក្រុមហ៊ុន Facebook បាននិយាយថា សកម្មភាពរបស់លោក ត្រាំ គឺជា “ការបំពានលើច្បាប់របស់យើងយ៉ាងធ្ងន់ធ្ងរ”។
ដោយឡែក លោក ត្រាំ បាននិយាយថា ការដាក់ទណ្ឌកម្មនេះគឺជា “ការប្រមាថ” ចំពោះមនុស្សរាប់លាននាក់ ដែលបានបោះឆ្នោតឲ្យរូបលោក នៅក្នុងការបោះឆ្នោតប្រធានាធិបតីកាលពីឆ្នាំមុន។
គួរឲ្យដឹងថា ការធ្វើបែបនេះរបស់ Facebook កើតឡើងនៅពេលដែលប្រព័ន្ធផ្សព្វផ្សាយសង្គមយក្សមួយនេះ ក៏កំពុងតែបញ្ចប់គោលនយោបាយការពារអ្នកនយោបាយ ពីច្បាប់សម្របសម្រួលមាតិកាមួយចំនួន ផងដែរ។ Facebook ថា ខ្លួននឹងមិនផ្តល់អភ័យឯកសិទ្ធិដល់អ្នកនយោបាយទៀតទេ ចំពោះខ្លឹមសារឆបោក ឬរំលោភបំពានដោយផ្អែកលើការអត្ថាធិប្បាយរបស់ពួកគេ៕