កាលពីពេលថ្មីៗនេះ ប្រធានក្រុមហ៊ុន Facebook និង Meta, លោក Mark Zuckerberg បានប្រកាសដាក់ចេញនូវគម្រោងខ្សែកាបក្រោមបាតសមុទ្រមួយមានឈ្មោះថា Project Waterworth ដែលជាប្រព័ន្ធគម្រោងខ្សែកាបក្រោមបាតសមុទ្រដែលមានប្រវែងវែងជាងគេបំផុតក្នុងពិភពលោក, ប្រមាណ 50,000 គីឡូម៉ែត្រ។
សម្រាប់គម្រោងនេះ មានគោលបំណងបង្កើនការតភ្ជាប់អ៊ីនធឺណិតជាសកល ដោយភ្ជាប់តំបន់ និងប្រទេសជាច្រើនរួមមាន សហរដ្ឋអាមេរិក, ឥណ្ឌា, ប្រេស៊ីល, អាហ្រ្វិកខាងត្បូង និងតំបន់ផ្សេងៗជាច្រើនទៀត ជាមួយនឹងការវិនិយោគលើសពី 10 ពាន់លានដុល្លារ។
ក្នុងគម្រោងនេះ ក្រុមហ៊ុន Meta ផ្ទាល់គ្រោងដាក់ខ្សែកាបនៅជម្រៅរហូតដល់ 7,000 ម៉ែត្រ និងប្រើប្រាស់បច្ចេកទេសបង្កប់កម្រិតខ្ពស់នៅក្នុងតំបន់ដែលមានហានិភ័យខ្ពស់ ដើម្បីកាត់បន្ថយហានិភ័យ។ ជាក់ស្តែងដូចជាការខូចខាតដល់ខ្សែកាបក្រោមបាតសមុទ្ររបស់តុងហ្គា ដែលបានធ្វើឱ្យកោះភាគច្រើនស្ថិតក្នុងការដាច់ចរន្តឌីជីថល។
ចំពោះប្រព័ន្ធខ្សែកាបនេះ នឹងត្រូវបានរចនាដោយខ្សែ optical fiber ចំនួន 24 គូរ ដែលអាចផ្តល់សមត្ថភាពផ្ទុកទិន្នន័យកម្រិតខ្ពស់ និងគាំទ្រសេវាកម្ម AI របស់ Meta និងមានតួនាទីសំខាន់ក្នុងការជំរុញដល់ការរួមបញ្ចូលនូវទំនាក់ទំនងឌីជីថល និងកំណើនសេដ្ឋកិច្ច នៅក្នុងទីផ្សារសំខាន់ៗដើម្បីពង្រីកការចូលប្រើអ៊ីនធឺណិតទៅកាន់តំបន់ជាច្រើនទៀតជាពិសេសនៅក្នុងប្រទេសកំពុងអភិវឌ្ឍន៍។
គួរបញ្ជាក់ផងថា ក្រុមហ៊ុន Meta គឺជាក្រុមហ៊ុនមួយដែលមានបទពិសោធន៍ជាង 10 ឆ្នាំ ក្នុងការអភិវឌ្ឍន៍ខ្សែកាបក្រោមសមុទ្រដោយបានចូលរួមក្នុងគម្រោងធំៗជាង 20 នៅលើពិភពលោក។
ប៉ុន្តែគម្រោងខ្សែកាបក្រោមបាតសមុទ្រមួយនេះ ក៏កំពុងទទួលបានក្តីបារម្ភអំពីផ្នែកសុវត្ថិភាពជាបន្តបន្ទាប់ផងដែរ ដោយសារតែចរាចរណ៍ទិន្នន័យអន្តរជាតិភាគច្រើនអាស្រ័យលើប្រព័ន្ធខ្សែកាបបែបនេះ ជាពិសេសនៅពេលដែលមានភាពតានតឹងផ្នែកភូមិសាស្ត្រនយោបាយ ខណៈបញ្ហានេះបានធ្វើឲអង្គការណាតូ និងប្រទេសជាច្រើនដូចជា ចក្រភពអង់គ្លេស កំពុងពង្រឹងការឃ្លាំមើល និងការពារបណ្តាញខ្សែកាបក្រោមបាតសមុទ្ររបស់ពួកគេ៕