CHAGEE ត្រូវបានលោក Zhang Junjie បង្កើតឡើងនៅក្នុង ខែមិថុនា ឆ្នាំ ២០១៧ និងបើកដំណើរការជាផ្លូវការនៅខែវិច្ឆិកា ឆ្នាំ ២០១៧។ បច្ចុប្បន្នម៉ាកយីហោមួយនេះ កំពុងទទួលបានភាពល្បីល្បាញ មានជាង ៦០០០កន្លែងកំពុងដំណើរការ។ ភាពជោគជ័យទាំងនេះ បានធ្វើឲ្យលោកក្លាយជាបុគ្គលជោគជ័យ មានទ្រព្យសម្បត្តិ និងឥទ្ធិពលទាំងវ័យក្មេង។
លោក Zhang Junjie កើតនៅឆ្នាំ ១៩៩៣ នៅទីក្រុង Kunming ខេត្ត Yunnan ប្រទេសចិន។ ស្ថានភាពជីវិតលោកមិនស្រស់បំព្រងនោះទេ លោកក្លាយជាក្មេងកំព្រានៅអាយុ ១០ឆ្នាំ។ នៅអាយុ ១៧ឆ្នាំ ក្លាយជាជំនួយការហាងតែគុជមួយកន្លែងនៅ Kunming។ លោកមិនបានរៀនសូត្រនោះទេ ទើបនឹងអាយុ ១៨ឆ្នាំ បានចាប់ផ្តើមរៀនអាន និងសរសេរដោយខ្លួនឯង ខណៈពេលកំពុងធ្វើការនៅក្នុងហាងនោះ។
ជាមួយនឹងភាពឧស្សាហ៍ព្យាយាម និងសមត្ថភាព លោក Zhang ត្រូវបានឡើងតំណែងពីកូនជំនួញការ ទៅជាជំនួញការអ្នកគ្រប់គ្រង រហូតក្លាយជាអ្នកគ្រប់គ្រង និងត្រួតពិនិត្យប្រចាំតំបន់ថែមទៀត។ ក្រៅពីនេះ លោកថែមទាំងក្លាយជាដៃគូសិទ្ធិផ្តាច់មុខយីហោតែគុជនេះទៀតផង។ បទពិសោធន៍ជាច្រើនដែលលោកបានឆ្លងកាត់ ទើបលោកសម្រចចិត្តបើកអាជីវកម្មផ្ទាល់ខ្លួន។ CHAGEE ឬ 霸王茶姬 ត្រូវបានបំផុសគំនិតចេញពីល្ខោនអូប៉េរ៉ាចិនបុរាណដ៏ល្បីល្បាញ រីឯឡូហ្គូ របស់ម៉ាកយីហោក៏រចនាឡើងទាក់ទងនឹងល្ខោនបុរាណនេះផងដែរ។
កាន់តែពិសេសនោះ លោកបានប្រើប្រាស់នូវស្លឹកតែស្រស់មកផលិតចេញជាភេសជ្ជៈ លាយឡំជាមួយនឹងការរចនាបែបវប្បធម៌ចិនទៀតនោះ កាន់តែធ្វើឲ្យហាងនេះខុសប្លែកពីគេ។ ដោយឡែក រយៈពេល ៤ឆ្នាំដំបូង ស្ថានភាពម៉ាកយីហោមួយនេះនៅមានកម្រិតនៅឡើយ។ បន្ទាប់ពីឆ្នាំ ២០២១មក CHAGEE មានការរីកចម្រើនលឿន ដោយមានការផ្លាស់ប្តូរទីស្នាក់ការកណ្តាលពី Kunming ទៅទីក្រុង Chengdu ដើម្បីចាប់ផ្តើមពង្រីកទៅទូទាំងប្រទេសចិន។
CHAGEE បានពង្រីកទៅកាន់ទីផ្សារអន្តរជាតិ ដោយដំបូងគេទៅកាន់ប្រទេសម៉ាឡេសុី សិង្ហបុរី និងមានហាងជាង ៦០០០កន្លែង នៅទូទាំងប្រទេសចិន និងក្រៅប្រទេស។ ជាងនេះទៅទៀត ក្នុងខែមេសា ឆ្នាំ ២០២៥ CHAGEE បានចុះបញ្ជីជាផ្លូវការនៅលើផ្សារហ៊ុន NASDAQ (CHA) ធ្វើឲ្យទ្រព្យសម្បតិ្តលោក Zhang Junjie កើនឡើងក្លាយជាមហាសេដ្ឋីវ័យក្មេង។ ភាពជោគជ័យរបស់លោក Zhang គឺជាការបំផុសគំនិតមួយសម្រាប់អ្នកជំនួញ ដោយបង្ហាញថាការតាំងចិត្ត ការមានគំនិតច្នៃប្រឌិត និងការផ្តោតលើគុណភាពផលិតផលអាចនាំមកនូវសមិទ្ធផលដ៏ធំធេង បើទោះជាចាប់ផ្តើមពីចំណុចសូន្យក៏ដោយ។