ចំពោះលក្ខណៈពិសេសរបស់វ៉ែនតា Hypernova គឺមានលក្ខណៈសម្បត្តិខុសប្លែកពីវ៉ែនតាម៉ូដែលមុនៗ ដោយវាត្រូវបានបំពាក់ដោយអេក្រង់បង្ហាញនៅជ្រុងខាងក្រោមនៃកញ្ចក់ខាងស្តាំតែប៉ុណ្ណោះ ពោលគឺវិធីនេះអាចអោយអ្នកប្រើប្រាស់អាចមើលព័ត៌មាននៅកញ្ចក់ខាងស្តាំ ខណៈកញ្ចក់ខាងឆ្វេងវិញ ប្រើសម្រាប់បង្ហាញទិដ្ឋភាពទូទៅធម្មតា។ ក្នុងនោះ វ៉ែនតានេះ គឺដំណើរការដោយឈីប Qualcomm និងប្រព័ន្ធប្រតិបត្តិការ Android ដែលបានកែសំរួលដោយក្រុមហ៊ុន Meta ផ្ទាល់តែម្តង។
មិនត្រឹមតែប៉ុណ្ណោះ Meta ក៏កំពុងអភិវឌ្ឍខ្សែដៃឆ្លាតវៃមួយទៀតផងដែរ មានឈ្មោះថា Ceres ដែលខ្សែដៃនេះអាចបញ្ជាពីច្រើនជ្រុងដោយប្រើកាយវិការក្នុងការគ្រប់គ្រងវ៉ែនតាបានទាំងស្រុង។
ចំពោះតម្លៃលក់របស់វ៉ែនតា Hypernova ត្រូវបានរំពឹងថានឹងមានចន្លោះពី $1,000 ទៅ $1,400 នៅក្នុងទីផ្សារអាមេរិក ដែលខ្ពស់ជាងវ៉ែនតាឆ្លាតវៃផ្សេងៗដូចជា Viture Pro និង Xreal One។ ខណៈការចេញលក់អាចនឹងធ្វើឡើងនៅចុងឆ្នាំ 2025 នេះតែម្តង។
គួរឲដឹងថា ក្នុងអំឡុងពេលដូចគ្នានេះ ក្រុមហ៊ុន Meta ផ្ទាល់ក៏កំពុងអភិវឌ្ឍវ៉ែនតាឆ្លាតវៃផ្សេងទៀតផងដែរ មានដូចជា Orion Holographic និង Aria Gen 2 AR ដែលជាវ៉ែនតាដែលផ្តោតសំខាន់លើការស្រាវជ្រាវ។ មិនត្រឹមតែប៉ុណ្ណោះ ក្រុមហ៊ុនគូរប្រកួតប្រជែងផ្សេងទៀតដូចជា Samsung ក៏បានរៀបចំការបង្ហាញវ៉ែនតាឆ្លាតវៃផ្អែកលើប្រព័ន្ធ Android ផងដែរ៕