មិនធម្មតា! ចំនួនលក់ឡាននៅវៀតណាម កើនឡើងវិញ ៥៨ភាគរយ

ការលក់រថយន្តរបស់ប្រទេសវៀតណាម ក្នុងរយៈពេល ៤ ខែដំបូង នៃឆ្នាំ ២០២១ បានកើនឡើង ៥៨ ភាគរយពីមួយឆ្នាំទៅមួយឆ្នាំ ដល់ចំនួន ១០១ ៣០៩ គ្រឿង ដែលជាសញ្ញាបង្ហាញពីការស្ទុះងើបឡើងវិញ ពីផលប៉ះពាល់នៃរោគរាតត្បាតកូវីដ១៩ កាលពីឆ្នាំមុន។

ពាណិជ្ជកម្ម

យោងតាមសមាគមអ្នកផលិតរថយន្តវៀតណាម (VAMA) បានឲ្យដឹងថា តួលេខនៃការលក់នេះបានកត់សម្គាល់ឃើញការកើនឡើងជាង ៣ ៦០០ គ្រឿង ធៀបនឹងរយៈពេលដូចគ្នាកាលពីឆ្នាំមុន នៅពេលដែលរលកទី១ នៃជំងឺកូវីដ១៩ បានវាយប្រហារមកលើប្រទេស។

ជាមួយគ្នានេះ ការលក់រថយន្តដឹកអ្នកដំណើរ និងរថយន្តពាណិជ្ជកម្ម កើនឡើង ៥៥ ភាគរយ និង ៦៦ ភាគរយពីមួយឆ្នាំទៅមួយឆ្នាំ។

សាជីវកម្មរថយន្ដ Truong Hai Auto Corporation (Thaco) ជាអ្នកឈានមុខគេលើផ្នែកលក់ ជាមួយនឹងការកើនឡើង៧៣ ភាគរយ ដល់ ៣៥ ៣៨៩ គ្រឿង បន្ទាប់មកគឺក្រុមហ៊ុន Toyota មានចំនួន ១៨ ៩៧៣ គ្រឿង កើនឡើង ១៥ ភាគរយ។

ក្នុងនោះផងដែរ ក្រុមហ៊ុន Mitsubishi, Honda និង Ford ក៏ជាអ្នកលក់រថយន្តលំដាប់កំពូលទាំង ៥ ដែរ នៅក្នុងត្រីមាសទី ១ នៃឆ្នាំ២០២១ នេះ៕