ការស្ទង់មតិមួយបានរកឃើញថា ៦៦ ភាគរយនៃអាជីវកម្មអាល្លឺម៉ង់ នៅក្នុងវៀតណាម រំពឹងថានឹងមានការរីកចម្រើនផ្នែកសេដ្ឋកិច្ច នៅឆ្នាំ ២០២១ នេះ ដែលកើនឡើង ២០ ភាគរយបើប្រៀបធៀបទៅនឹងឆ្នាំមុន។
ការរកឃើញនេះមាននៅក្នុងរបាយការណ៍ 2021 World Business Outlook ដែលបានចេញផ្សាយនាពេលថ្មីៗនេះ ដោយសភាពាណិជ្ជកម្មអាល្លឺម៉ង់ក្រៅប្រទេស German Chambers of Commerce Abroad (AHK) ។
ការស្ទង់មតិនេះបានវិភាគលើមតិយោបល់ពីក្រុមហ៊ុន សាខា និងក្រុមហ៊ុនបុត្រសម្ព័ន្ធរបស់អាល្លឺម៉ង់ជាង ៤ ៥០០ កន្លែង នៅទូទាំងពិភពលោក រួមទាំងប្រទេសវៀតណាមផងដែរ។ អ្នកឆ្លើយតបជាងពាក់កណ្តាល ស្ថិតក្នុងវិស័យសេវាកម្ម ហើយអ្នកដែលនៅសល់ ស្ថិតនៅក្នុងវិស័យសំណង់ និងឧស្សាហកម្ម ព្រមទាំងផ្នែកពាណិជ្ជកម្មលក់រាយ។
របាយការណ៍នោះបានបង្ហាញថា អ្នកឈានមុខគេផ្នែកពាណិញ្ជកម្មអាល្លឺម៉ង់នៅវៀតណាម ទន្ទឹងរង់ចាំការងើបឡើងវិញនៅឆ្នាំ ២០២១ និង ២០២២ ដោយមួយភាគបីនៃអ្នកឆ្លើយតបបាននិយាយថា សេដ្ឋកិច្ចរបស់ប្រទេសនេះនឹងងើបឡើងវិញនៅឆមាសទីមួយ នៃឆ្នាំនេះ ខណៈ ៣០ ភាគរយផ្សេងទៀតរំពឹងថា ការងើបឡើងវិញនឹងកើតឡើងនៅឆ្នាំក្រោយ៕